నూతన రాష్ట్రా రాజధాని అమరావతిని ప్రపంచంలోని ఉన్నత నగరాల్లో ఒకటిగా తీర్చిదిద్దడానికి ఆంధ్రప్రదేశ్ ప్రభుత్వం రంగం సిద్ధం చేసుకుంటోంది. చాలా కాలంగా సింగపూర్ బృందంతో కసరత్తు చేస్తోంది. నగరంలో రహదారులు, కాలువల వ్యవస్థ గ్రిడ్‌ల రూపంలో ఎలా ఉండాలనే అంశం దీర్ఘ కాలం కసరత్తు చేశారు. చివరకు ఓ నిర్ణయానికి వచ్చారు. సమాంతర రోడ్లు, హబ్బుల అనుసంధానం వంటి ప్రణాళికతో తుది రూపును సిద్ధం చేశారు.
దేశంలోనే ఎక్కడా లేని విధంగా తొలిసారిగా రాజధానిలో రహదారులు వంపులు లేకుండా, ఒకదానికి ఒకటి సమాంతరంగా రోడ్లను సిద్ధం చేశారు. గ్రామ కంఠాలకు ఇబ్బంది ఏర్పడుతుందనే ఉద్దేశంతో తప్పనిసరై 'వీ' ఆకారంలో రోడ్లను మలుపు తిప్పారు. పాలవాగు, కొండవీటివాగులను కృష్ణా నదితో అనుసంధానిస్తూ కాలువల గ్రిడ్‌ను ప్రభుత్వం రూపొందించింది. రోడ్లు, కాలువల గ్రిడ్‌లకు ముఖ్యమంత్రి చంద్రబాబునాయుడు ఆమోదం తెలిపారు.
గ్రిడ్‌లో భాగంగా ప్రభుత్వం, పర్యాటకం, వైద్య-ఆరోగ్యం, న్యాయస్థానాలు, విద్య, క్రీడలు, వాణిజ్యం సహా తొమ్మిది అంశాలకు ఉద్దేశించిన తొమ్మిది ప్రాంతాలను కలుపుతూ సువిశాల రహదారులు నిర్మితమవుతాయి. కృష్ణా నదికి సమాంతరంగా పాలవాగు, కొండవీటి వాగులు ఉన్నాయి. వీటిని కలుపుతూ అడ్డంగా ఆరు కాలువలు వస్తాయి.
