ఆంధ్రప్రదేశ్ రాష్ట్రంలో ప్రస్తుతం జరుగుతున్న ఎన్నికల్లో ప్రజాశాంతి పార్టీ అధినేత కిలారి ఆనంద్ పాల్‌ (కె.ఎ. పాల్‌)కి ఎంత క్రేజ్ లభిస్తూందో అందరికీ తెలిసిందే. ఈ నేపథ్యంలో పలు టీవీ, యూట్యూబ్ ఛానెళ్లు ఆయనను పలు రకాలుగా ఇంటర్వ్యూ చేసేందుకు పోటీ పడుతున్నాయి. తాజాగా ఓ ప్రముఖ టీవీ ఛానెల్‌కి చెందిన యాంకర్ ఆయనని భిన్నంగా ఇంటర్వ్యూ చేసే క్రమంలో భాగంగా, పాల్‌‍ని స్కూటర్‌ వెనుక సీటులో కూర్చోబెట్టేసుకుని ప్రయాణించారు.
అయితే... ఈ ఇంటర్వ్యూలో సదరు యాంకర్ హెల్మెట్ పెట్టుకోలేదు. దీంతో కార్తీక్ అనే ట్విట్టర్ యూజర్ ఆ యాంకర్‌పై హైదరాబాద్ ట్రాఫిక్ పోలీసులకు ఫిర్యాదు చేస్తూ... ‘‘సర్, టీవీ యాంకర్ కేఏ పాల్‌తో కలిసి హెల్మెట్ లేకుండా వాహనం నడుపుతోంది. వీళ్లకు రూల్స్ లేవా’’ అంటూ ఫొటోను ట్వీట్ చేసాడు.
అయితే, ఆమె పాల్‌ను ఇంటర్వ్యూ చేసిన ప్రాంతం హైదరాబాద్‌లోనిది కాకపోవడంతో... దీనిపై స్పందించిన హైదరాబాద్ పోలీసులు విజయవాడ ట్రాఫిక్ పోలీసులను ట్విట్టర్‌లో ట్యాగ్ చేసి చేతులు దులిపేసుకున్నారు. మరి దీనిపై విజయవాడ పోలీసులు ఎలా స్పందిస్తారో వేచి చూడాలి.
