ప్రేమ పేరుతో తన కుమార్తెపై కత్తితో దాడి చేసిన భరత్‌ను ఎన్కౌంటర్ చేయాలని, ఈ దుస్థితి ఏ ఆడపిల్లకూ రాకూడదని 15 రోజుల పాటు మృత్యువుతో పోరాడి ప్రాణాలు నిలుపుకున్న మధులిక తండ్రి రాములు ప్రభుత్వానికి విజ్ఞప్తి చేశారు.
ఈనెల 6వ తేదీన ప్రేమోన్మాది భరత్‌ బాలికను వేధించడమేకాకుండా తన ప్రేమను నిరాకరించినందుకు కత్తితో దాడిచేసి హత్యాయత్నానికి ఒడిగట్టిన విషయం తెలిసిందే. ఈ దాడిలో గాయపడిన మధులిక మలక్‌పేట యశోద ఆస్పత్రిలో 15 రోజులపాటు ప్రాణాలతో పోరాడి చివరకు ప్రాణాపాయం నుంచి బయటపడింది. ఏడు శస్త్రచికిత్సలు చేసిన డాక్టర్ల బృందం ఆమె ప్రాణాలను కాపాడారు. ఆరోగ్యం కుదుటపడడంతో బుధవారం మధ్యాహ్నం 1.30 గంటలకు ఆస్పత్రి నుంచి డిశ్చార్జి చేశారు.
దీనిపై మధులిక తండ్రి మీడియాతో మాట్లాడుతూ, 15 రోజులపాటు నా బిడ్డ ప్రాణాలతో పోరాడింది. వైద్యులు పునర్జన్మ ఇచ్చారు. ఆమె జీవితంతో ఆడుకొని మాకు ఈ దుస్థితి కల్పించిన భరత్‌ను ఎన్కౌంటర్ చేయాలి. లేదంటే ఉరి తీయాలి. అతడికి సహకరించిన కుటుంబ సభ్యులనూ కఠినంగా శిక్షించాలి. మధులికపై జరిగిన దాడిలాంటి ఘటనలు ఏ ఆడపిల్లపై జరగకుండా ప్రభుత్వం చర్యలు తీసుకోవాలన్నారు ఆమె తండ్రి రాములు. ఈనెల 6వ తేదీన ప్రేమోన్మాది భరత్‌ బాలికను వేధించడమే కాకుండా తన ప్రేమను నిరాకరించినందుకు కత్తితో దాడిచేసి హత్యాయత్నానికి ఒడిగట్టిన విషయం తెలిసిందే.
