నంద్యాల ఎన్నికల ఫీవర్ హై వోల్టేజిని దాటిపోతోంది. బాలయ్య నంద్యాలలో ఇవాళ ప్రచారం ప్రారంభించారు. వెంటనే వైసీపీ ఎమ్మెల్యే రోజా లైన్లోకి వచ్చేశారు. బాలకృష్ణపై తీవ్ర వ్యాఖ్యలు చేశారు రోజా. మహిళలు కనబడితే ముద్దులు పెట్టాలనీ, కడుపులు చేయాలని బాలయ్య మహిళల పట్ల చేసిన అగౌరవ పదజాలం మరువలేమని చెప్పుకొచ్చారు.
బాలయ్య నిజానికి అమాయకుడనీ, ఆయనకు స్క్రిప్టులు చదవడం తప్పించి అసలు వాస్తవాలు ఏమిటో మాట్లాడటం చేతకాదని ఎద్దేవా చేశారు. పార్టీ మారిన ఆది నారాయణరెడ్డి, అఖిలప్రియలను పక్కన పెట్టుకుని శిల్పా సోదరులపై విమర్శలు ఎలా చేస్తారంటూ ప్రశ్నించారు రోజా.
భూమా శోభానాగిరెడ్డి విలువలతోనే చివరి శ్వాస వరకూ జీవించారనీ, అఖిలప్రియ విలువలకు తిలోదకాలిచ్చి తెలుగుదేశం పార్టీలో మంత్రి పదవి కోసం వెళ్లిపోయారని విమర్శించారు. 600 హామీలు ఇచ్చిన సీఎం చంద్రబాబు నాయుడు ఒక్క హామీ అయినా నెరవేర్చారా... అలాంటి పార్టీకి ప్రజలు బుద్ధి చెప్పాలనీ, నంద్యాలలో డిపాజిట్లు కూడా దక్కకుండా ఓడించాలని ఆమె పిలుపునిచ్చారు.
