ఏపీ సీఎం చంద్రబాబు నాయుడుపై వైకాపా ఎమ్మెల్యే రోజా తీవ్రస్థాయిలో మండిపడ్డారు. సీఎంగా ప్రమాణ స్వీకారం చేసిన వెంటనే ఏదో ఘనకార్యం చేస్తున్నట్లు.. ఐదు సంత‌కాలు పెట్టార‌ని గుర్తు చేశారు. ఇందులో 2014 జూన్‌లోనే బెల్టు షాపులు ఉండ‌నివ్వ‌మ‌ని సంత‌కం పెట్టిన చంద్రబాబు ఇన్నేళ్ల‌యినా వాటిని అరికట్టలేకపోయారన్నారు. చంద్రబాబు ఫాదర్ ఆఫ్ బెల్ట్ షాప్ అని అందరూ అంటున్నట్లు రోజా ఎద్దేవా చేశారు.
చంద్రబాబు పెట్టిన ఐదు సంత‌కాల్లో నాలుగు దిక్కులేకుండా పోయాయని విమర్శించారు. రైతుల‌కు, డ్వాక్రా మ‌హిళ‌ల‌కు పూర్తి స్థాయిలో రుణ‌మాఫీ జ‌ర‌గ‌లేద‌ని అన్నారు. అప్ప‌ట్లో వైస్ రాజ‌శేఖ‌ర్ రెడ్డి మాత్రం ప్రమాణ స్వీకారం కాగానే సంత‌కాలు చేసి, వాటిని వెంటనే స‌మ‌ర్థంగా అమ‌లుప‌రిచారని గుర్తు చేశారు.
పింఛన్ల విషయంలో వెయ్యి రూపాయలు ఇస్తామని ప్రకటించుకున్నారని.. ఎంతోమందిని మోసం చేశారని రోజా విమర్శించారు. చంద్రబాబు నాయుడి సొంత నియోజ‌క వ‌ర్గం కుప్పంలోనూ పింఛ‌న్లు ఇవ్వ‌డం లేదన్నారు. రూ.5లకే అన్నం పెడ‌తామ‌న్నారని, అదీ కూడా లేదని రోజా ఫైర్ అయ్యారు. దీన్ని బ‌ట్టే చంద్రబాబు ఎంత అస‌మ‌ర్థుడో పూర్తిగా అర్థం చేసుకోవ‌చ్చ‌ని విమర్శించారు.
