కొబ్బరిలో ఆరోగ్యానికి మేలు చేసే పోషకాలెన్నో వున్నాయి. కొబ్బరి నూనెను వంటల్లో వాడుకుంటే బరువు తగ్గుతారు. అలాగే కొబ్బరి నూనెను రకరకాల సౌందర్య లేపనాల తయారీలో కూడా ఉపయోగిస్తారు. కొబ్బరి పాలు, కొబ్బరి నూనెను రకరకాల వంటకాలలో కూడా వాడుతుంటారు. అలాంటి కొబ్బరి నూనెను వాడే వారు ప్రస్తుతం కరువైపోతున్నారు.
పూర్వ కాలంలో చిన్న పిల్లలకు కొబ్బరి నూనెతో ఒళ్లంతా మర్దన చేసిన తర్వాతనే స్నానం చేయించేవాళ్లు. నేటి తరానికి ఆ సుగుణాలను అందించేందుకు కొబ్బరి నీళ్లతో, లేత కొబ్బరితో తయారుచేసే సబ్బులు మార్కెట్‌లోకి వచ్చేశాయి. ఇది మృత కణాలను తొలగించి, చర్మాన్ని మృదువుగా చేసేందుకు ఇవి ఉపయోగపడతాయి.
అలాగే కొబ్బరిలో పోషకాలు ఎక్కువ. కెలోరీలు కార్బోహైడ్రేట్లూ తక్కువ. అందుకే ఒబిసిటీతో ఇబ్బంది పడేవారు వంటల్లో కొబ్బరి నూనెను ఉపయోగించాలని ఆయుర్వేద నిపుణులు సూచిస్తున్నారు. ముఖ్యంగా కేరళలో ఈ కొబ్బరి చెట్లు అధికంగా ఉండటం వలన అన్ని రకాల వంటకాలలో కొబ్బరి నూనెను, కొబ్బరి పాలను ఉపయోగిస్తారు. ఇది శరీరంలోని కొవ్వును తగ్గిస్తుంది.
కొబ్బరి నూనెను శిరోజాలకు, కోకో ఫెయిర్ నెస్ క్రీమ్స్, మాయిశ్చరైజర్స్, ముఖారవిందాన్నీ, చర్మసౌందర్యాన్ని రెట్టింపు చేయటానికి ఉపయోగించే అన్నిరకాల కాస్మోటిక్స్ తయారీలో ఉపయోగిస్తారు. నూనె తీసేసిన తర్వాత మిగిలిన కొబ్బరితో తయారుచేసే పిండిని కొబ్బరి పిండి అంటారు. దీనిని రకరకాల బిస్కెట్లు, చాక్లెట్లు, పిండి వంటల తయారీలో వినియోగిస్తారు. ఇది ఆరోగ్యానికి మంచి పోషణను ఇస్తుందని ఆరోగ్య నిపుణులు సూచిస్తున్నారు.
