అరటిపండులోని తేమగుణం వలన వెంట్రుకలు ఊడవు. అంతేకాదు, అరటిపండ్లలోని విటమిన్స్, ప్రోటీన్స్ వంటి ఖనిజాలు శిరోజాలను వృద్ధిచేయడమే కాకుండా వాటి ఆరోగ్యాన్ని కూడా పరిరక్షిస్తాయి. అలాంటి కొన్ని అరటిపండు హెయిర్ మాస్కులు మీకోసం..
అరటిపండు, బొప్పాయి ప్యాక్:
ఈ మాస్కులో ప్రోటీన్స్ పుష్కలంగా ఉంటాయి. ఇది రాసుకోవడం వలన జుట్టుకు మెరుపు రావడమే కాదు వెంట్రుకలు పటిష్టంగా ఉంటాయి. బాగా పండిన అరటిపండును కచ్చాపచ్చాగా చేయాలి. దాంట్లో బాగా పండిన 4 బొప్పాయి ముక్కలను వేయాలి. ఈ రెండింటిని కలిపి గుజ్జులా చేయాలి. ఇందులో 2 స్పూన్ల తేనె కలిపి పేస్ట్‌లా చేయాలి.
మాడు మీద, తలకు ఈ మిశ్రమాన్ని బాగా పట్టించాలి. వెంట్రుకలను ఒక చోటుకు చేర్చి ముడివేసి తలకు షవర్ క్యాప్ పెట్టుకోవాలి. కాసేపటి తరువాత గోరువెచ్చని నీళ్ళతో వెంట్రుకలను బాగా కడిగేసుకుని షాంపూతో తలస్నానం చేయాలి.
అరటిపండు, ఆలివ్ ఆయిల్ ప్యాక్:
ఈ మాస్కు వలన దెబ్బతిన్న వెంట్రుకలు చక్కబడుతాయి. ఒకే ఒక మెత్తటి అరటిపండు తీసుకుని అందులో 2 స్పూన్ల ఆలివ్ ఆయిల్ కలుపుకుని మెత్తని పేస్ట్‌లా తయారుచేసుకోవాలి. ఆ పేస్ట్‌ను బ్రష్ సహాయంతో వెంట్రుకలకు రాసుకుని తలకు షవర్ క్యాప్ పెట్టుకోవాలి. 20 నిమిషాల తరువాత తలను షాంపూతో శుభ్రంగా రుద్దుకుని తలస్నానం చేయాలి. ఆలివ్ నూనెకు బదులు కొబ్బరి నూనె కూడా వాడొచ్చు.
