దేశంలో పెట్రోల్ ధరలు విపరీతంగా మండిపోతున్నాయి. దీనికి కారణం ఓపెక్ దేశాలు ముడి చమురు ఉత్పత్తిని గణనీయంగా తగ్గించడమే. కరోనా సాకు చూపిన ఓపెక్ దేశాలు ముడి చమురు ఉత్పత్తిని చాలా మేరకు తగ్గించాయి. దీంతో అంతర్జాతీయ మార్కెట్‌లో ముడి చమురు బ్యారెల్ ధరలు ఒక్కసారిగా పెరిగిపోయింది. దీంతో దేశీయంగా కూడా చమురు ధరలు ఆకాశానికి తాకాయి.
ఈ నేపథ్యంలో చమురు ఉత్పత్తి పెంచాలని కేంద్ర ప్రభుత్వం ఒపెక్ (పెట్రోలియం ఎగుమతి దేశాల సంస్థ) దేశాలను కోరింది. అయితే, ఒపెక్ దేశాల్లో కీలకమైన సౌదీ అరేబియా చాలా వ్యంగ్యంగా సమాధానమిచ్చింది. గతేడాది తమ నుంచి అత్యంత చవకగా కొనుగోలు చేసి దాచుకున్న చమురును ఇప్పుడు బయటికి తీసి వాడుకోవాలని సూచించింది.
అందుకు సౌదీ అరేబియా ఇంధన శాఖ మంత్రి ప్రిన్స్ అబ్దులజీజ్ బిన్ సల్మాన్ స్పందిస్తూ... భారత్ కిందటేడాది తమ నుంచి అతి తక్కువ ధరలకే భారీ మొత్తంలో చమురు కొనుగోలు చేసి నిల్వ చేసిందని వెల్లడించారు. ఇప్పుడా నిల్వల నుంచి చమురును బయటికి తీసి ఉపయోగించుకోవాలని అన్నారు. తమ మిత్రదేశం భారత్ ఎదుర్కొంటున్న సమస్యకు ఇంతకంటే తరుణోపాయం లేదన్నారు.
