దేశంలో ఇప్పటికే పెట్రోల్, డీజల్ ధరల్ ఇబ్బడిముబ్బడిగా పెరిగిపోయాయి. వీటి రేట్లు అనేక రాష్ట్రాల్లో సెంచరీ కొట్టాయి. దీంతో ఆటో, ట్యాక్సీల్లో ప్రయాణం చేయాలంటే బెంబేలెత్తిపోతున్నారు. ఈ క్రమంలో కొత్త యేడాది నుంచి యాప్‌ల ద్వారా బుక్ చేసుకునే ఆటోలు, మోపెడ్‌లకు కూడా జీఎస్టీని వసూలు చేయాలని ప్రభుత్వం నిర్ణయించింది.
ఫలితంగా వీటి ప్రయాణం మరింత భారంకానుంది. ర్యాపిడో బుక్ చేసుకున్నప్పటికీ ఈ జీఎస్టీ వర్తిస్తుంది. ఆన్‌లైన్‌లో కాకుండా బయట ఆటోను బుక్ చేసుకుంటే మాత్రం ఇది వర్తించదు. ఓలా, ఉబర్ వంటి రైడ్ షేరింగ్ యాప్‌లలో ఆటో బుక్ చేసుకుంటే మాత్రం ప్రభుత్వం 5 శాతం జీఎస్టీని వసూలు చేయాలని నిర్ణయించింది. బుక్ చేసుకునే సమయంలోనే ఐదు శాతం జీఎస్టీని కలిసి ధరను నిర్ణయిస్తారు.
ప్రస్తుతం హైదరాబాద్ నగరంలోనే దాదాపు 4 లక్షల మందిపై భారంపడనుంది. నగరంలో 38 వేల ఆటోలు, ఓలా, ఉబర్ నుంచి బుకింగ్స్ స్వీకరిస్తున్నాయి. అలాగే ఒక్కో ఆటో రోజుకు 20 నుంచి 25 వేల ట్రిప్పులు వేస్తుంటాయి. ఇవన్నీ కలుపుకుంటే 8 లక్షల పైగా రైడ్లు అవుతున్నాయి.
ఈ లెక్కన చూసుకుంటే ప్రయాణికులపై నిత్యం లక్షల రూపాయల భారం పడనుంది. నిజానికి పేద, మధ్యతరగతి ప్రజలు కారు కంటే ఆటోకే అధిక ప్రాధాన్యత ఇస్తారు. ఇపుడు ఈ ప్రయాణ చార్జీలను కూడా జీఎస్టీ పరిధిలోకి తీసుకుని రావడంతో ప్రయాణికులపై మరింత భారంపడనుంది.
