ఆస్ట్రేలియా కెప్టెన్ మైఖేల్ క్లార్క్ అంతర్జాతీయ వన్డే క్రికెట్ నుంచి తప్పుకోనున్నారు. ఈయనకు ఈనెల 29వ తేదీన న్యూజిలాండ్‌తో జరిగే వరల్డ్ కప్ 2015 ఫైనల్ మ్యాచే చివరి మ్యాచ్ కానుందా? అవుననే అంటున్నారు ఆయన స్నేహితులు, సన్నిహితలు, ఆస్ట్రేలియా క్రికెట్ వర్గాలు.
క్రికెట్ ఆస్ట్రేలియా వర్గాల అంచనా ప్రకారం వన్డేలకు క్లార్క్ గుడ్ బై చెప్పనున్నట్టు సమాచారం. వరల్డ్ కప్ ఫైనల్ మ్యాచ్ ముగిసిన తర్వాత క్లార్క్ వన్డేల నుంచి తప్పుకోనున్నట్టు ప్రకటన చేసే అవకాశముందని వారు భావిస్తున్నారు. కాగా, క్లార్క్ గత కొంత కాలంగా ఫిట్నెస్ సమస్యలతో తీవ్రంగా ఇబ్బంది పడుతున్నాడు. మాజీ కెప్టెన్ రికీ పాంటింగ్ నుంచి పగ్గాలు చేపట్టిన క్లార్క్ సమర్థవంతంగా జట్టును నడిపాడు. వన్డేల నుంచి తప్పుకుని టెస్టుల్లో కొనసాగాలని క్లార్క్ భావిస్తున్నట్టు సమాచారం.
