విమర్శకుల నోటికి రికీ తాళం వేస్తాడని భావిస్తున్నా: ద్రవిడ్
ఆస్ట్రేలియా మాజీ కెప్టెన్ రికీ పాంటింగ్ ఇకపై జరిగే మ్యాచ్‌ల్లో మంచి స్కోర్లు సాధించి విమర్శకుల నోటికి తాళం వేస్తాడని భావిస్తున్నానని టీమిండియా సీనియర్ బ్యాట్స్‌మన్ ‘మిస్టర్ డిపెండబుల్’ రాహుల్ ద్రవిడ్ పేర్కొన్నాడు. ప్రపంచంలోని అత్యంత ప్రతిభావంతులైన బ్యాట్స్‌మెన్లలో ఒకడిగా రికీ పాంటింగ్ ఇప్పటికీ కొనసాగుతున్నాడని ద్రవిడ్ అభిప్రాయపడ్డాడు.
ఇటీవలి కాలంలో పేలవమైన ఫామ్‌తో సతమతమవుతున్న పాంటింగ్ జాతీయ జట్టు నుంచి తప్పుకోవాలన్న వాదన బలంగా వినిపిస్తున్న తరుణంలో ద్రవిడ్ ఈ అభిప్రాయాన్ని వెలిబుచ్చడం ప్రాధాన్యతను సంతరించుకుంది.
పేలవమైన ఫామ్‌తో దాదాపు రెండేళ్ల నుంచి ఒక్క సెంచరీ కూడా నమోదు చేయలేకపోయిన పాంటింగ్ సగటున కేవలం 28.74 పరుగులు మాత్రమే చేయడంతో జాతీయ జట్టు నుంచి అతన్ని తప్పించాలని విమర్శకులు బలంగా వాదిస్తున్నారు.
ఈ నేపథ్యంలో త్వరలో స్వదేశంలో భారత్‌తో జరిగే నాలుగు టెస్టుల సిరీస్‌లో పాంటింగ్ రాణించినా రాణించలేకపోయినా మున్ముందు మాత్రం అతను గతంలో మాదిరిగా మళ్లీ చెలరేగడం ఖాయమని ద్రవిడ్ అంటున్నాడు.
