తనను లైంగికంగా వేధిస్తూ వచ్చిన ఓ ప్రైవేట్ ట్యూటర్‌ను ఓ బాలుడు కత్తితో పొడిచాడు. ఈ ఘటన ఢిల్లీలోని జామియా నగర్ ప్రాంతంలో జరిగింది. తాజాగా వెలుగులోకి వచ్చిన ఈ వివరాలను పరిశీలిస్తే, వసీం అనే 28 యేళ్ల ప్రైవేట్ ట్యూటర్ తన వద్దకు వచ్చే బాలుడిని కొన్ని రోజులుగా లైంగిక వేధింపులకు గురిచేస్తున్నాడు.
పలుమార్లు వేధించడమే కాకుండా, ఆ ఘటనను వీడియో కూడా తీసి బయటకు చెబితే వీడియోను సోషల్ మీడియాలో పోస్టు చేస్తానని బెదిరించాడు. ఈ క్రమంలో గత నల 30వ తేదీన 11.30 గంటల సమయంలో బాలుడిని మరోమారు పిలిచాడు. అప్పటికే అతడి చేష్టలతో విసిగిపోయిన బాలుడు.. వసీంను చంపాలని నిర్ణయించుకున్నాడు. పేపర్ కటర్‌ను వెంట తీసుకెళ్లిన బాలుడు.. వసీం తనపై లైంగికదాడికి యత్నించిన వెంటనే కత్తితో పొడిచి చంపేశాడు.
ఆగస్టు 30న ఓ ఇంట్లో మృతదేహం పడివుందన్న సమాచారంతో పోలీసులు ఘటనా స్థలానికి చేరుకున్నారు. మృతుడిని వసీంగా గుర్తించారు. ఆ ఇల్లు అతడి తండ్రిదని, కొన్ని రోజులుగా అది ఖాళీగా ఉందని తెలిసింది. బాధితుడు తన కుటుంబంతో కలిసి జకీర్ నగరులో ఉంటున్నట్టు పోలీసులు తెలిపారు. బాలుడిని అదుపులోకి తీసుకుని విచారించగా నేరాన్ని అంగీకరించాడు. దీనిపై కేసు నమోదు చేసిన పోలీసులు విచారణ జరుపుతున్నారు.
