లండన్‌లోని భారత దౌత్య కార్యాలయంలోకి సోమవారం దూసుకువచ్చిన ఐదుగురు తమిళ ఆందోళనకారులను అక్కడి అధికారులు అరెస్టు చేశారు.
శ్రీలంకలో ఎల్‌టిటిఈపై సైన్యం దాడులకు పాల్పడుతుండటంతో లండన్‌లోని వేలాదిమంది తమిళులు అక్కడి భారత దౌత్య కార్యాలయం వెలుపల నిరసన ప్రదర్శన జరిపారు. ఈ సందర్భంగా ఐదుగురు తమిళులు కార్యాలయం లోపలకు దూసుకు వచ్చి బుల్లెట్ ప్రూఫ్ అద్దాలను పగులగొట్టారు.
ఈ సందర్భంగా ఐదుగురు ఎల్‌టిటిఈ సానుభూతిపరులకు మెట్రోపాలిటన్ పోలీసులు బేడీలు వేసి అదుపులోకి తీసుకున్నట్టు ఉన్నతాధికారులు తెలిపారు. ఆల్డ్‌విచ్‌లోని భారత ఎంబసీ కార్యాలయంలోని ఇండియా హౌస్ వద్ద సోమవారం ఉదయం ఈ సంఘటన జరిగినట్టు కార్యాలయ సిబ్బంది ధ్రువీకరించారు.
ఇదిలావుండగా తొలుత సుమారు 100 మంది ప్రదర్శనకారులు అక్కడకు చేరుకోగా, వీరి సంఖ్య క్రమంగా మూడు వేలకు పెరిగిందని ఎంబసీ ఉన్నతాధికారులు తెలిపారు.
