కెనడా పార్లమెంటు ప్రాంగణంలో దుండగులు జరిపిన కాల్పులను అమెరికా అధినేత బారక్ ఒబామా తీవ్రంగా ఖండించారు. ఈ ఘటనకు సంబంధించిన వివరాలను నిఘా వర్గాల నుంచి ఆయన సేకరించారు. ఇలాంటి దాడులకు అమెరికా పూర్తిగా వ్యతిరేకమని తెలిపారు. కెనడా పార్లమెంటుపై కొందరు దుండగులు జరిపిన దాడుల్లో ఒక సైనికుడు ప్రాణాలు కోల్పోగా, మరో సైనికుడు గాయపడ్డాడు.
ఇదిలావుండగా, కెనడా రాజధాని అట్టావాలోని పార్లమెంట్ సమీపంలో బుధవారం ఓ ఆగంతుకుడు ఆ దేశ సైనికుడిపై కాల్పులకు దిగాడు. ఆ తర్వాత సదరు దుండగుడు పార్లమెంట్ భవన సముదాయం వైపు చొచ్చుకెళ్లాడు. దీంతో భద్రతా బలగాలు ఆ ప్రాంతాన్ని చుట్టుముట్టాయి. కాల్పుల నేపథ్యంలో పార్లమెంట్‌ను మూసివేశారు.
