కరోనా లాక్డౌన్ కష్టకాలంలో ప్రేమికుల పాట్లు అన్నీఇన్నీకావు. లాక్డౌన్ సమయంలో తమ ఇళ్ళకే పరిమితమైన ప్రేమికులు... ఒంటరిగా విరహ వేదన అనుభవించలేకపోయారు. ఈ క్రమంలో పొరుగింటి మహిళతో అక్రమ సంబంధం పెట్టుకున్న ఓ వ్యక్తి ఆమెను రహస్యంగా కలిసేందుకు ఏకంగా ఆమె ఇంటి వద్దకు సొరంగం తవ్వాడు. ఈ ఘటన మెక్సికోలోని టిజువానాలో జరిగింది.
తాజాగా వెలుగులోకి వచ్చిన ఈ వివరాలను పరిశీలిస్తే, టిజువానాకు చెందిన అల్బెర్టో అనే భవన నిర్మాణ కార్మికుడికి తన పొరుగింటి మహిళ పమెలాతో వివాహేతర సంబంధం ఉంది. పమెలా భర్త జోర్గే ఉద్యోగానికి వెళ్లగానే అల్బెర్ట్‌ ఆమె ఇంట్లో వాలిపోయేవాడు.
ఇలా రోజూ వెళ్తే చుట్టుపక్కల వాళ్లకు అనుమానం వస్తుందనో ఏమో.. తన ఇంటి నుంచి ఆమె ఇంటికి ఒక సొరంగాన్ని తవ్వి దాంట్లోంచి వెళ్లడం ప్రారంభించాడు. ఒకరోజు జోర్గే.. రోజూ కన్నా ముందుగా ఇంటికి వచ్చేసరికి.. పమెలా, అల్బెర్ట్‌ల నిర్వాకం అతడి కంటపడింది.
అప్పటికే అక్కడ ఉన్న అల్బెర్టో.. 'నా భార్య నిద్రపోతోంది. గట్టిగా గొడవ చేస్తే నా గురించి ఆమెకు తెలిసిపోతుంది' అంటూ పమెలా భర్త కాళ్లు పట్టుకున్నంత పని చేశాడు. కానీ, కోపంతో రగిలిపోతున్న పమెలా భర్త పెద్దగా అరిచి గొడవ చేయడం విషయం చుట్టుపక్కలవారందరికీ.. ఆపై ప్రపంచం మొత్తానికీ తెలిసిపోయింది. ఆపై పోలీసులకు ఫిర్యాదు చేయడంతో కేసు నమోదు చేశారు. అల్బెర్ట్‌ను అదుపులోకి తీసుకున్నారు.
