ఒక మహిళకు ఎంతమందైనా భర్తలు ఉండొచ్చా? ప్రపంచ దేశాల్లో ఈ వింత ఆచారం ఎక్కడా లేదు. కానీ, ఆఫ్రికా దేశాల్లో ఒకటైన సౌతాఫ్రికాలో మాత్రం ఇది అందుబాటులోకి రానుంది. ఈ మేరకు ఆ దేశ ప్రభుత్వం ఓ గ్రీన్ పేపర్‌ను సిద్ధం చేసింది.
ప్రపంచంలో అత్యంత ఉదారమైన రాజ్యాంగ వ్యవస్థలు కలిగిన దేశాల్లో దక్షిణాఫ్రికా ఒకటి. ఇప్పటికే అక్కడ స్వలింగ వివాహాలు, బహుభార్యత్వం అమల్లో ఉన్నాయి. తాజాగా బహుభర్తృత్వంపై వచ్చిన ప్రతిపాదనలనూ ఆ దేశ ప్రభుత్వం స్వీకరించింది.
ఇష్టమొచ్చినన్ని పెళ్లిళ్లు చేసుకునే స్వేచ్ఛ మగవారికి ఉన్నప్పుడు ఒకరిని మించి భర్తలను పొందే స్వేచ్ఛ మహిళలకు ఎందుకుండొద్దు? అంటూ దక్షిణాఫ్రికాలో మహిళలు, పురుషులకు సమాన హక్కుల కోసం పోరాడుతున్న సామాజికవేత్తలు ప్రశ్నిస్తున్నారు.
ప్రజల అభిప్రాయాలను స్వీకరించేందుకు ఆ దేశ హోంమంత్రిత్వశాఖ, ఈ గ్రీన్ పేపర్‌ను జారీ చేసింది. అయితే బహుభర్తృత్వ ప్రతిపాదనలను అక్కడి సంప్రదాయవాదులు, కొన్ని మతసంస్థల ప్రతినిధులు తీవ్రంగా వ్యతిరేకిస్తున్నారు.
