గాఢంగా ప్రేమించిన ప్రియుడికి ఎయిడ్స్ ఉందని తెలిసి.. ప్రేయసి ఏం చేసిందంటే..?

గాఢంగా ప్రేమించిన ప్రియుడికి ఎయిడ్స్ ఉందని తెలియడంతో ప్రియురాలు అతడిని చంపేయాలని నిర్ణయించుకుంది. ఈ క్రమంలో సైకిల్లో వెళ్తున్న అతడిని కారుతో ఢీకొట్టింది. దీంతో అతడు ఘటనా స్థలంలోనే కుప్పకూలిపోయాడు. ఈ ఘటన అరిజోనాలోని పోనిక్స్లో జరిగింది. పూర్తి వివరాలను పరిశీలిస్తే... మిస్టీ లీ విక్కీ అనే మహిళ... తన ప్రియుడికి ఎయిడ్స్ ఉందనే విషయం తెలుసుకుని లోలోన రగిలిపోయింది. 

ఎలాగైనా అతడిని హతమార్చాలని పన్నాగం పన్నింది. ఈ క్రమంలోనే ఒకరోజు సైకిల్‌పై వెళ్తున్నఅతడిని కారుతో గుద్దేసింది. దీంతో బంతి ఎగిరినట్టు గాల్లోకి కొన్ని అడుగుల ఎత్తు ఎగిరి కుప్పకూలిపడ్డాడు. స్పృహ కోల్పోయిన అతడు కొద్ది నిమిషాల తర్వాత తేరుకుని మెల్లగా లేచి కొద్ది దూరం నడిచి మరోసారి కుప్పకూలాడు. ఈ విషయాన్ని గమనించిన స్థానికులు అతడిని ఆస్పత్రిలో చేర్పించారు. అతడికి తీవ్ర గాయాలయ్యాయి. కాగా ఇక్కడే అసలు ట్విస్ట్ మొదలైంది.

సీసీటీవీ కెమెరాలో ఈ వీడియో రికార్డు కావడంతో అసలు గుట్టు బయటపడింది. ఈ రోడ్డు ప్రమాదంపై విచారణ జరిపిన పోలీసులు సీసీటీవీ ఫుటేజీ ఆధారంగా కారు నడిపిన వ్యక్తిని గుర్తించారు. మిస్టీ లీ విక్కీ అనే మహిళ ఆరోజు కారు నడిపిందని, ఆమె ఆ సైక్లిస్ట్ గర్ల్ ఫ్రెండ్ అని పోలీసులు నిర్ధారించారు. మరి ఎందుకు అలా చేసిందని పోలీసులు అన్ని కోణాల్లో విచారణ జరిపారు. 

పోలీసుల విచారణలో అతడికి హెచ్ఐవీ ఉందని, ఆ విషయం తనతో చెప్పలేదనే ఆగ్రహంతో అతడిని చంపేయాలనుకున్నానని అంగీకరించింది. ఈ మేరకు పోలీసులు ఆమెపై హత్యాయత్నం కేసు నమోదుచేసి అరెస్టు చేశారు.