ఆర్కే పచౌరీకి చిక్కులు : సహోద్యోగిని వేధించినట్టు ఆధారాలున్నాయ్.. ఢిల్లీ కోర్టు

లైంగిక వేధింపుల కేసు మెడకు ప్రముఖ పర్యావరణవేత్త ఆర్కే.పచౌరీ మెడకు చుట్టుకునేలా ఉంది. సహోద్యోగిని లైంగికంగా వేధించినట్టు తగిన ఆధారాలు ఉన్నాయని ఢిల్లీ కోర్టు అభిప్రాయపడింది. ఈ వేధింపుల కోసంలో పోలీసులు దాఖలు చేసిన చార్జిషీటును పరిశీలించిన తర్వాత కోర్టు ఈ తరహా వ్యాఖ్యలు చేసింది. 

పచౌరీపై ఢిల్లీ పోలీసులు దాఖలు చేసిన కేసు విచారణ ఢిల్లీ మెట్రోపాలిటన్ మేజిస్ట్రేట్‌ కోర్టులో సాగుతున్న విషయం తెల్సిందే. ఈ కేసులో పోలీసులు దాఖలు చేసిన చార్జిషీటును పరిశీలించిన మేజిస్ట్రేట్ శివానీ చౌహాన్‌... పచౌరికి వ్యతిరేకంగా కేసు విచారణను ముందుకు సాగించేందుకు తగిన ఆధారాలు ఉన్నాయని పేర్కొంటూ తదుపరి విచారణను జూలై 11వ తేదీకి వాయిదా వేశారు. 

కాగా గత 2015లో ఆర్కే పచౌరి.. ఇంధన వనరుల పరిశోధన సంస్థ (టెరి) అధిపతిగా ఉన్నప్పుడు ఆ సంస్థలోని ఓ మహిళా ఉద్యోగినిపై దాడి చేశాడని, లైంగిక వేధింపులకు పాల్పడే ఉద్దేశంతో ఆమెను వెంటాడాడని, ఆమె పరువుకు భంగం కలింగించేలా వ్యవహరించాడని ఐపీసీ సెక్షన్ల కింద ఆయనపై పోలీసులు అభియోగాలు నమోదుచేసిన విషయం తెల్సిందే.