బీహార్ రాష్ట్ర రాజధాని పాట్నాలో లవ్ జిహాద్ ఘటన ఒకటి వెలుగులోకి వచ్చింది. నాలుగేళ్ళ క్రితం హిందూ మతానికి చెందిన యువతిని ప్రేమించి పెళ్లి చేసుకున్న ఓ యువకుడు ఇపుడు మతం మార్చుకుంటేనే కాపురం చేస్తానని లేకుంటే విడాకులు ఇస్తానంటూ ఒత్తిడి చేస్తున్నాడు. దీంతో ఆ యువతి.. ధైర్యం చేసి రాష్ట్ర మహిళా కమిషన్ దృష్టికి తీసుకెళ్లింది.
తాజాగా వెలుగులోకి వచ్చిన ఈ వివరాలను పరిశీలిస్తే, బీహార్‌లోని ముంగేర్ ప్రాంతానికి చెందిన ఓ ముస్లిం యువకుడు, పాట్నాలో నివాసముండే హిందూ మతానికి చెందిన యువతిని ప్రేమించి పెళ్లి చేసుకున్నాడు. పెళ్లి సమయంలో భార్యను మతం మార్చుకోవాలని చెప్పలేదు. ప్రస్తుతం మతం మార్చుకోనిపక్షంలో తనతో ఉండేందుకు నిరాకరించాడు.
ఈ కేసు వెలుగులోకి వచ్చిన తర్వాత, బాధితురాలి ఫిర్యాదు మేరకు విచారణ చేపట్టినట్లు బీహార్ రాష్ట్ర మహిళా కమిషన్ చైర్మన్ దిల్మానీ మిశ్రా చెప్పారు. ఇద్దరూ కోర్టు సమక్షంలో వివాహం చేసుకున్నందున వారికి ఆలోచించుకునేందుకు సమయం ఇవ్వాల్సి ఉంటుందని, ఈ కేసు తదుపరి విచారణ ఫిబ్రవరిలో నిర్వహించనున్నట్లు మహిళా కమిషన్ నిర్ణయించింది.
