మధ్యప్రదేశ్ రాష్ట్రంలో దారుణం జరిగింది. రెండేళ్ళ క్రితం 27 యేళ్ల మహిళపై అత్యాచారం జరిగింది. ఈ కేసు విచారణలో భాగంగా, బాధితురాలితో రాజీ కుదుర్చుకునేందుకు 45 యేళ్ల కామాంధుడు ప్రయత్నించాడు. దీనికి ఆమె జాప్యం చేయడంతో చేతి వేళ్లు నరికేశాడు. ఈ దారుణ ఘటన తాజాగా వెలుగులోకి వచ్చింది. ఈ వివరాలను పరిశీలిస్తే...
మధ్యప్రదేశ్ రాష్ట్రంలోని తికమ్‌ఘడ్‌లోని జరాన్ ప్రాంతానికి చెందిన 45 ఏళ్ల కున్వర్ లాల్ రెండేళ్ల క్రితం 27 ఏళ్ల మహిళపై అత్యాచారం చేశాడు. 2014 అక్టోబరులో జరిగిన ఈ అత్యాచారం కేసు రెండేళ్లకు కోర్టులో విచారణకు వచ్చింది. ఇన్నాళ్లు జైలులో ఉన్న నిందితుడు కున్వర్ లాల్‌కు గత నెలలో స్థానిక కోర్టు బెయిల్ మంజూరు చేసింది.
దీంతో జైలు నుంచి బయటకు వచ్చిన కామాంధుడు కున్వర్ లాల్ తన సహచరులైన మహేంద్రయాదవ్, భగవాన్ యాదవ్ లతో కలిసి అత్యాచార బాధితురాలైన మహిళను కేసులో రాజీపడేలా రాతపూర్వకంగా రాసి ఇవ్వాలని ఒత్తిడి చేయసాగాడు. కేసులో తనతో రాజీపడకుంటే తీవ్ర పరిణామాలు ఎదుర్కోవాల్సి వస్తుందంటూ బెదిరిస్తూ వచ్చాడు.
ఆ కామాంధుడితో ఆ బాధితురాలు రాజీకి రాకపోవడంతో ఆగ్రహించిన కామాంధుడు.. ఆ మహిళ రెండు వేళ్లను నరికివేశాడు. ఈ ఘటనపై బాధిత మహిళ పోలీసు ఎస్పీ నిమిష్ అగర్వాల్‌ను కలిసి తన చేతివేళ్లు చూపించి కామాంధుడిపై ఫిర్యాదు చేశారు. తాను కేసులో రాజీకి రానందుకే తన చేతివేళ్లు నరికివేశాడని బాధితురాలు పోలీసులకు ఇచ్చిన ఫిర్యాదులో పేర్కొంది.
