నువ్వు ఏ గొట్టంగాడివి అయితే నాకేంటి : హీరోకు ఎమ్మెల్సీ వార్నింగ్ (వీడియో)

బాలీవుడ్ బాద్‌షా షారూక్ ఖాన్‌పై మహారాష్ట్రకు చెందిన ఎమ్మెల్సీ ఒకరు మండిపడ్డారు. నువ్వు సూపర్‌స్టార్‌వి అయితే నాకేంటి అంటూ నిలదీశారు. అంతేనా, అలీబాగ్ మొత్తాన్ని నువ్వు కొన్నావా? నా అనుమతి లేకుండా ఇక్కడ అడుగుపెట్టలేవు అంటూ సీరియస్ వార్నింగ్ ఇచ్చారు. ఈనెల 3వ తేదీన చేసిన ఈ వ్యాఖ్యలకు సంబంధించిన వీడియో ఒకటి తాజాగా వెలుగులోకి వచ్చింది. ఈ వీడియో ఇపుడు వైరల్ అయింది. 

ఇంతకీ ఈ తరహా వార్నింగ్ ఇచ్చింది పీజంట్స్ అండ్ వర్కర్స్ పార్టీ ఆఫ్ ఇండియాకు చెందిన ఎమ్మెల్సీ జయంత్ పాటిల్. ముంబైలోని గేట్ ఆఫ్ ఇండియా జెట్టీ నుంచి అర్జెంట్‌గా అలీబాగ్‌కు వెళ్లేందుకు బోటు ఎక్కాడు. అయితే, ముందు బోటులో షారుక్‌ఖాన్ ఎక్కివున్నాడు. ఈ బోటు కదిలితేనే జయంత్ పాటిల్ బోటు కదలాల్సి ఉంది. 

కానీ, షారూక్ బోటు ఎంతకీ ముందుకు కదలకపోవడంతో పాటిల్ సహనం కోల్పోయారు. ఎంతకీ షారుక్ ఆ బోటు నుంచి బయటకు దిగకపోవడం, అది అక్కడి నుంచి కదలకపోవడంతో.. షారుక్‌పై పాటిల్ మండిపడ్డారు.

సూపర్‌స్టార్‌వి అయినంత మాత్రాన ఇతరులను ఇబ్బంది పెట్టడం సరికాదంటూ మండిపడ్డారు. పాటిల్ అలీబాగ్‌కే చెందినవారు కావడంతో.. తన అనుమతి లేకుండా ఇక్కడ అడుగుపెట్టలేవు అంటూ ఎంతో ఆవేశంతో షారుక్‌ను హెచ్చరించారు. ఈ వీడియో వైరల్ కావడంతో జయంత్ మీడియా ముందుకు వచ్చి వివరణ ఇచ్చారు. 

షారుక్ కోసం చాలా మంది అక్కడున్నారు. సెక్యూరిటీ ఉంది. చాలాసేపటి వరకు షారుక్ అక్కడి నుంచి కదల్లేదు. నేను అయినా వేచి చూశాను. పోలీసులు కూడా ఏమీ చేయలేదు అంటూ పాటిల్ వివరించారు. దీంతో షారుక్‌పై నోరు పారేసుకున్నట్టు అంగీకరించారు. 

#WATCH: Jayant Patil, Maharashtra MLC from Alibaug, heckled Shah Rukh Khan for not coming out of his yacht at Alibaug Jetty (Mobile video) pic.twitter.com/lq5owiKZnw

— ANI (@ANI) November 11, 2017