ఈ నెల 18వ తేదీ నుంచి పార్లమెంట్ ప్రత్యేక సమావేశాలు ప్రారంభంకానున్నాయి. ఈ సమావేశాలు కొత్త భవనంలో నిర్వహించేలా ఏర్పాట్లు చేశారు. ప్రారంభ సమావేశాలు మాత్రం అంటే 18వ తేదీన జరిగే సమావేశంలో పాత భవనంలో ప్రారంభించి, ఆ తర్వాత రోజు నుంచి కొత్త భవనంలో నిర్వహించనున్నారు.
మరోవైపు, ఈ ప్రత్యేక సమావేశాల అజెండాను బహిర్గతం చేయాలంటూ విపక్ష పార్టీలన్నీ డిమాండ్ చేస్తున్నాయి. కానీ, కేంద్ర ప్రభుత్వం మాత్రం ఏమాత్రం పెదవి విప్పడం లేదు. ఈ నేపథ్యంలో తాజాగా ఒక విషయం వెలుగులోకి వచ్చింది.
మన దేశంలో పార్లమెంటు "ప్రత్యేక సమావేశాలు" చాలా అరుదుగా జరుగుతుంటాయి. స్వాతంత్య్రం సిద్ధించి వందేళ్లు పూర్తిచేసుకునే దిశగా భారత్‌ అడుగులు వేస్తున్న "అమృత్‌ కాలం"లో ఐదు రోజుల పాటు పార్లమెంట్ ప్రత్యేక సమావేశాలను ఏర్పాటుచేశారు. ఆ సందర్భంగా జరిగే చర్చలు ఫలవంతం కావాలని కేంద్రం ఆశిస్తున్నట్లు ఇటీవల పార్లమెంటరీ వ్యవహారాల మంత్రి వ్యాఖ్యానించారు.
