సరైన ధ్రువీకరణ పత్రాలు లేని కారణంచేత సౌదీలో దేశ బహిష్కారానికి గురైన ఆయా కేంద్రాలలో మగ్గుతున్న భారతీయులను ఆదుకుని, వారిని వెంటనే వెనక్కి రప్పించే చర్యలు తీసుకోవాలని కేరళ విపక్ష నాయకుడు ఉమెన్ చాందీ కేంద్ర ప్రభుత్వానికి డిమాండ్ చేశారు. ఈ దేశ బహిష్కార కేంద్రాలలో సరైన సదుపాయాలు లేని కారణంగా వందలాదిమంది భారతీయులు దుర్భర జీవితం గడుపుతున్నారని ఆయన ఆవేదన వ్యక్తం చేశారు.
ఈ మేరకు కేంద్ర విదేశాంగ శాఖా మంత్రి ఎస్.ఎం. కృష్ణ, కేంద్ర ప్రవాస వ్యవహారాల శాఖా మంత్రి వాయలార్ రవిలకు ఉమెన్ చాందీ ఓ లేఖ రాశారు. దేశ బహిష్కరణ కేంద్రాలలో గడుపుతున్న భారతీయులు (కేరళ ప్రాంతానికి చెందినవారితో సహా) ఎన్నో వ్యాధులతో సతమతమవుతున్నారనీ, స్వదేశాలకు తిరిగి వచ్చేందుకు వారివద్ద తగినంత డబ్బు లేకపోవడంతో తీవ్ర ఇబ్బందులకు గురవుతున్నారని పేర్కొన్నారు.
భారతీయుల దుర్భర పరిస్థితిని అర్థం చేసుకుని, ఆ విషయాన్ని తీవ్రంగా పరిగణించి, ఉన్నత స్థాయిలో ఈ సమస్య పరిష్కారానికి కృషి చేయాలని ఉమెన్ చాందీ ఈ సందర్భంగా ప్రభుత్వానికి విన్నవించారు. అలాగే రియాద్ రాయబార కార్యాలయంలో కేరళ అధికారులను కూడా నియమించాలని చాందీ ఈ లేఖలో కేంద్రాన్ని కోరారు.
