పోస్ట్ గ్రాడ్యుయేషన్ పట్టా కలిగిన విదేశీ వృత్తి నిపుణులకు నేరుగా గ్రీన్ కార్డులు మంజూరు చేసేందుకు అమెరికా కాంగ్రెస్ కసరత్తు చేస్తోంది. విదేశీ వృత్తి నిపుణులు తమ దేశం వదలి వెళ్లకుండా ఉండేందుకు తీసుకుంటున్న చర్యల్లో భాగంగా... ఇటీవలనే అమెరికా కాంగ్రెస్‌లో ఓ బిల్లును కూడా ప్రవేశపెట్టారు.
ఈ బిల్లు గనుక కాంగ్రెస్ ఆమోదం పొందినట్లయితే... భారతదేశంతో సహా పలు దేశాలకు చెందిన పీజీ పూర్తి చేసిన విద్యార్థులు అమెరికాలో శాశ్వతంగా నివాసం ఉండవచ్చు. పీజీలున్నవారు హెచ్1బి వీసాలు, వర్క్ వీసాల కోసం దరఖాస్తు చేసుకోకుండా నేరుగా గ్రీన్ కార్డుకే దరఖాస్తు చేసుకోవచ్చు.
అయితే సైన్స్, టెక్నాలజీ, ఇంజనీరింగ్, గణితం సబ్జెక్టులలో పోస్ట్ గ్రాడ్యుయేషన్ పూర్తి చేసిన వారికి మాత్రమే గ్రీన్ కార్డులకు దరఖాస్తు చేసుకునే అవకాశం ఉంటుంది. అమెరికా ప్రభుత్వం ప్రవేశపెట్టిన పై బిల్లుకు ఆమోదం లభిస్తే.. అమెరికాలో అత్యధికంగా పీజీ పట్టాలు పొందుతున్న భారత్, చైనా విద్యార్థులకే ఎక్కువగా ప్రయోజనం చేకూరనుంది. ఇలాంటి వారిని హెచ్1బి వీసా కోటా పరిమితి నుంచి కూడా మినహాయింపు ఇస్తారు.
