భారత విదేశాంగఖాశ వ్యవహారాల సహాయమంత్రి ప్రణీత్ కౌర్.. 2009 సంవత్సరానికిగానూ సిక్కులకు ఇచ్చే ప్రతిష్టాత్మక "సిక్క్ ఆఫ్ ది ఇయర్" అవార్డుకు ఎంపికయ్యారు. కాగా.. పంజాబ్ రాష్ట్రానికి విశేషంగా సేవలు అందించిన వ్యక్తులగానూ ఈ అవార్డును ప్రతి సంవత్సరం అందజేస్తారు.
లండన్‌లోని హౌస్ ఆఫ్ లార్డ్స్‌లో జరిగిన అంతర్జాతీయ సిక్కుల ఫోరం నిర్వహించిన ఓ సమావేశంలో సిక్క్ ఆఫ్ ది ఇయర్ అవార్డును ప్రణీత్ కౌర్‌కు ప్రముఖ వ్యాపారవేత్త లార్డ్ ఇల్తాఫ్ షేక్ అందజేశారు. ఈ సమావేశానికి అక్కడి లిబరల్ డెమోక్రాట్ ఉప నాయకుడు లార్డ్ నవనీత్ ధోలకియా కూడా హాజరయ్యారు.
ఈ సందర్భంగా లార్డ్ ఇల్తాఫ్ షేక్ మాట్లాడుతూ.. పంజాబ్ అభివృద్ధి ఎంతగానో కృషిచేసిన ప్రణీత్‌కు ఈ అవార్డు లభించడం సముచితమని అన్నారు. ఇదే సందర్భంగా ప్రణీత్ కౌర్ మాట్లాడుతూ.. గతంలో తాను ఎన్నోరకాల అవార్డులను, రివార్డులను అందుకున్నప్పటికీ, ఈ సిక్క్ ఆఫ్ ది ఇయర్ అవార్డు మాత్రం ఎంతో విలువైనదని సంతోషం వ్యక్తం చేశారు.
ఇంకా ఈ సమావేశంలో లార్డ్ విస్కౌంట్ స్లిమ్, జస్టిస్ మోటా సింగ్, రంజిత్ సింగ్, ఓబీఈ, ఫోరమ్ ప్రెసిడెంట్, ఆర్ఎస్ బాక్సీ, సురీందర్ ఔజ్లా, రామీ రాంగర్ తదితరులు పాల్గొని, కౌర్‌కు అభినందనలు తెలియజేశారు.
