పద్మనాభ ఆలయంలో ‘దేవ ప్రశ్నం’ నిర్వహించనున్నారు. తిరువనంతపురం అనంత పద్మనాభ స్వామి ఆలయంలో భారీ సంపద బయటపడిన నేపథ్యంలో సంపద లెక్కింపుపై జ్యోతిష్యం ద్వారా దైవ నిర్ణయాన్ని తెలుసుకునేందుకుగాను "దేవ ప్రశ్నం" నిర్వహించనున్నారు.
ఆలయ ప్రధాన అర్చకులు "థంత్రి" ఆమోదంలో ఈ కార్యక్రమం సోమవారం నుంచి మూడు రోజుల పాటు జరుగుతుంది. ఈ కార్యక్రమంలో కేరళ సహా ఇతర ప్రాంతాలకు చెందిన ప్రముఖ జ్యోతిష్యులు పాల్గొంటారని తెలిసింది. ట్రావెన్‌కోర్ రాజ వంశీ యుల చొరవతో జరగనున్న ఈ కార్యక్రమాన్ని ఆలయ ప్రాంగణం సమీపంలోని బంగ్లాలో నిర్వహించనున్నారు.
ఇప్పటికే ఐదు నేలమాళిగల్లో భారీ సంపద బయటపడగా, ఆరో నేలమాళిగ ద్వారంపై నాగబంధం ఉండటంతో దాన్ని తెరిచేందుకు అధికారులు వెనుకంజ వేస్తున్నారు. ఈ దేవ ప్రశ్నం కార్యక్రమంలో ఆరో నేలమాళిగను సైతం తెరవడమా వద్దా అనే అంశంపై కూడా చర్చ జరిగే అవకాశం ఉందని అధికారులు చెబుతున్నారు.
