మెగాస్టార్ అంటూ చిత్ర రంగంలో పిలుచుకునే చిరంజీవి పార్టీ పెట్టి.. కాంగ్రెస్ వ్యతిరేకంగా పోరాడి. మళ్ళీ అదే కాంగ్రెస్లో కలవడం ఒక భాగం. అయితే ఇటీవలే కాంగ్రెస్వారు ప్రజారాజ్యం పార్టీ వారిని చాలా చులకన చూస్తున్నట్లు ఆయన పార్టీ ఎమ్మెల్యేలు కాస్తంత అసహనాన్ని కూడా ప్రదర్శించారు.
ఈ నేపధ్యంలో ఈ రొచ్చు రాజకీయాలు మీకెందుకు.. సినిమావైపు కన్నువేయాలని సలహా ఇస్తున్నారట కొంతమంది శ్రేయోభిలాషులు. దాంతో తన 150వ సినిమాను ప్రతిష్టాత్మకంగా తీయాలని చిరంజీవి కంకణం కట్టుకున్నట్లు భోగట్టా.
దీనికి రచయితలుగా ఎవరైతే బాగుంటుందో అని మరో మాట లేకుండా పరుచూరిబ్రదర్స్కు అవకాశం కల్పించారు. వారు ఏడాదినాడు చెప్పిన ఓ స్వాతంత్య్ర సమరయోధుని కథకు మళ్ళీ తుదిమెరుగులుదిద్ది, ఇప్పటి ట్రెండ్కు అనుగుణంగా మార్చి తయారుచేస్తున్నారు. బుధవారం కథాచర్చలు మళ్ళీ జరుగుతున్నాయి. ఈ విషయాన్ని పరుచూరి బ్రదర్స్ ధృవీకరించారు.
చిరంజీవి కెరీర్లో చిరస్థాయిగా నిలిచిపోయే చిత్రాన్ని చేయడానికి సన్నాహాలు చేస్తున్నామనీ, చిరంజీవి ఈ చిత్రంలో కొత్తగా కన్పిస్తారని చెబుతున్నారు. మరి ఎలా ఉంటుందో వెయిట్ అండ్ సీ...