తెలుగులో ఐశ్వర్యారాయ్ నటించనున్న తొలి పూర్తి చిత్రం ఏది.. చిరంజీవిదేనట..

బాలీవుడ్ దివా ఐశ్వర్యారాయ్ గత పదిహేనేళ్లలో దక్షిణాదిన కధానాయికగా చిత్రించిన సినిమాలు కేవలం రెండంటే రెండు. అవి కూడా తమిళ సినిమాలే. ఒకటి మణిరత్నం తీసిన రావన్, శంకర్ తీసిన రోబో. ఎందుకో ఏమో కానీ సౌత్ సినిమాలు అంటే ఐశ్వర్య రాయ్‌కు అంత ఆసక్తి లేదనిపిస్తుంది. తెలుగులో అయితే ఒక్క నిర్మాతా ఆమెతో నటింపచేసే సాహసం చేయలేదింతవరకు. అలాంటిది ఇప్పుడు తాజాగా ఐశ్వర్యారాయ్‌ను ఎలాగోలా తెలుగు సినిమాలో నటిపజేసే ప్రయత్నాలు తీవ్రంగా జరుగుతున్నాయని సమాచారం. అదికూడా అల్లాటప్పా హీరోల సరసన కాదు. మెగాస్టార్ చిరంజీవి సరసన ఆమెను జోడీగా తీసుకురావాలనుకుంటున్నారు. 

సౌత్‌ సినిమాల ఎంపికలో ఆచి తూచి వ్యవహరిస్తున్న ఐశ్వర్యను చిరంజీవికి జోడీగా తీసుకోవాలను కుంటున్నారని ఫిల్మ్‌నగర్‌ టాక్‌. చిరంజీవి హీరోగా సురేందర్‌రెడ్డి దర్శకత్వంలో ‘ఉయ్యాలవాడ నరసింహారెడ్డి’ సినిమా రూపొందనున్న సంగతి తెలిసిందే. ఈ చిత్రంలో చిరు సరసన ఐశ్వర్య జంటగా నటించడం ఖాయమనే వార్తలు వస్తున్నాయి. 

అప్పుడెప్పుడో హీరోయిన్‌గా కెరీర్‌ స్టార్ట్‌ చేసిన కొత్తల్లో నాగార్జున ‘రావోయి చందమామ’లో ఐశ్వర ఓ ఐటమ్‌ సాంగ్‌ చేశారు. ఆ తర్వాత స్ట్రయిట్‌ తెలుగు సిన్మా చేయలేదు. ఇప్పుడీ సినిమాకు సైన్‌ చేస్తే హీరోయిన్‌గా ఆమె చేసే ఫస్ట్‌ స్ట్రయిట్‌ తెలుగు మూవీ అవుతుంది. ఇప్పటికే ఉయ్యాలవాడ నరసింహారెడ్డి సినిమాతో సంచలనం రేపుతున్న చిరంజీవి సరసన ఐశ్వర్యా రాయ్ కథానాయికగా నటిస్తే బాక్స్ బద్దలు కావాల్సిందే అంటున్నారు అభిమానులు.