రజినీ కాంత్ అల్లుడు నటుడు ధనుష్ నటుడిగానే పనికిరాడు అని ఎగతాళికి గురైన నటుడు. ''తుళ్ళువదో ఇళమై'' చిత్రం ద్వారా హీరోగా పరిచయమైన ధనుష్‌ను ఆ చిత్రం విడుదల తర్వాత ఇలాంటి వాళ్లంతా హీరోగా నిలబడతారా? అని పరిహాసం చేసినవారు లేకపోలేదు. అయితే తొలి చిత్రంతోనే మంచి విజయాన్ని అందుకుని ఆ తర్వాత నటుడిగా ఒక్కో మెట్టు ఎక్కుతూ ఇప్పుడు తిరుగులేని కథానాయకుడిగా ఎదిగారు.
ఈ హీరో నటించిన ''ఆడుగళం'' చిత్రంతో నటుడిగా జాతీయ అవార్డును, ''కాక్కాముట్టై'' చిత్రంతో నిర్మాతగా మారి జాతీయ అవార్డును అందుకున్న ధనుష్ ''వై దిస్ కొలవెరి డీ'' పాటతో గాయకుడిగా, గీత రచయితగా ప్రపంచ వ్యాప్తంగా క్రేజ్ సంపాదించుకున్నారు. ఇలా నటుడిగా గాయకుడిగా, గీతరచయితగా, నిర్మాతగా విజయపథంలో పయనిస్తున్న ధనుష్ తాజాగా సంగీత దర్శకుడిగా మరో అవతారం ఎత్తారు. దీనికి సంబంధించిన ఓ ఫోటో సామాజిక మాధ్యమాలలో చక్కెర్లు కొడుతోంది.
ఈ ఫోటోలో తనలో ఉన్న సంగీత దర్శకుడి ప్రత్యేకతను చాటుకునేందుకు ఇలా ప్రయత్నించినట్లు ఉన్నారు ధనుష్. అయితే పక్కనే ఉన్న ధనుష్ అన్న సెల్వ రాఘవన్‌, సంగీత దర్శకుడు యువన్‌ శంకర్‌రాజాలు ''తట్టుకోలేకపోతున్నాం..'' అంటూ సరదాగా ఆటపట్టిస్తున్న దృశ్యమిది. సెల్వరాఘవన్‌ దర్శకత్వంలో తెరకెక్కుతున్న ''నెంజం మరప్పదిల్లై'' సినిమా రికార్డింగ్‌ తరుణంలో తీసిన చిత్రమిది.
