మెగాస్టార్ చిరంజీవికి, జీవితా రాజశేఖర్ దంపతులకు మధ్య వైరం ఉన్న విషయం ప్రతి ఒక్కరికీ తెలుసు. అయితే, అదంతా కేవలం మీడియా ప్రచారం మాత్రమేనని, తమమధ్య ఎలాంటి విభేదాలు లేవనీ వారు మరోమారు నిరూపించారు. తాజాగా జీవితా రాజశేఖర్ ఇచ్చిన ఓ ప్రైవేట్ పార్టీకి చిరంజీవితో పాటు ఆయన సోదరుడు నాగబాబు, హీరో మోహన్ బాబు, నిర్మాతలు టి.సుబ్బిరామిరెడ్డి, సి.అశ్వినీదత్‌ తదితరులు హాజరయ్యారు.
నిజానికి మెగాస్టార్ చిరంజీవి తన 151వ చిత్రం "సైరా నరసింహా రెడ్డి" షూటింగ్‌లో బిజీగా ఉన్నారు. అయితే, ఈ చిత్రం తొలి షెడ్యూల్ ఇటీవలే పూర్తయింది. రెండో షెడ్యూల్ వచ్చే నెలలో ప్రారంభంకానుంది. దీంతో మొన్న‌టివ‌ర‌కు పొడుగు మీసం, భారీ గ‌డ్డంతో కనిపించిన చిరు ఇప్పుడు నార్మ‌ల్ లుక్‌లో స్టైలిష్‌గా కనిపిస్తున్నాడు.
కాగా, రాజశేఖర్ హీరోగా నటించిన చిత్రం "పీఎస్‌వి గరుడవేగ" చిత్రం మంచి విజ‌యం సాధించిన విషయం తెల్సిందే. ఈ సంద‌ర్భంగా రాజశేఖర్ ఫ్యామిలీ ఇలా కొంద‌రితో క‌లిసి స‌ర‌దా పార్టీ సెల‌బ్రేట్ చేసుకుందనే టాక్ ఫిల్మ్ నగర్‌లో వినిపిస్తోంది. ఏదిఏమైనా చిరంజీవి, రాజశేఖర్‌లు ఇలా అన్యోన్య‌యంగా క‌నిపించ‌డం ఇద్దరి హీరోల అభిమానులకు శుభవార్తేనని చెప్పుకోవచ్చు.
