యంగ్ టైగర్ ఎన్టీఆర్ ప్రస్తుతం అరవింద సమేత సినిమా ప్రమోషన్‌లో వున్నారు. ఈ సినిమా ప్రీ-రిలీజ్ ఫంక్షన్‌లో దివికేగిన తన తండ్రి, నటుడు, హరికృష్ణ గురించి తలచుకున్నారు. అభిమానుల మధ్య భావోద్వేగానికి గురయ్యారు. తాజాగా ఓ ఇంటర్వ్యూలో తన తండ్రి గురించిన ఆసక్తికర విషయాలు, అరవింద సినిమా విశేషాలు చెప్పుకొచ్చారు. తాను బాగా వంట చేస్తానని.. చివరిగా తన తండ్రికి భోజనం పంపించిన విషయం గురించి గుర్తుచేసుకున్నారు.
ఇంకా ఎన్టీఆర్ మాట్లాడుతూ.. నాన్న మరణానికి కొద్దిరోజుల క్రితం నాకు ఫోన్ చేశారు. పలావ్ కావాలని అడిగారు. నాన్న అడిగారని షూటింగ్ నుంచి ఇంటికి వెళ్ళగానే స్పెషల్‌గా పలావ్ చేసి నాన్నకు పంపించానన్నారు. చివరి సారిగా నాన్నగారికి అదే ఇచ్చాను అని భావోద్వేగానికి గురయ్యారు. అరవింద సమేత ఈ నెల 11న రిలీజ్ కానున్న సంగతి తెలిసిందే.
త్రివిక్రమ్ దర్శకత్వం వహించిన ఆ సినిమాను రాధాకృష్ణ నిర్మించారు. ఈ సినిమా షూటింగ్‌లో దర్శకుడు త్రివిక్రమ్, సినీ యూనిట్ మొత్తం తనకు అండగా నిలబడ్డారని.. త్రివిక్రమ్ ఆత్మబంధువుగా మారిపోయారని జూనియర్ ఎన్టీఆర్ వ్యాఖ్యానించారు.
