తలైవి లుక్ వైరల్: పది కేజీలు పెరిగిన కంగనా రనౌత్

Kangana Ranaut

తమిళనాడు మాజీ సీఎం జయలలిత బయోపిక్‌గా తలైవి రూపుదిద్దుకుంటున్న సంగతి తెలిసిందే. ఈ చిత్రంలో జయలలిత పాత్రధారిగా బాలీవుడ్‌ క్వీన్ కంగ‌నా ర‌నౌత్ నటిస్తోంది. ఎ.ఎల్. విజయ్ దర్శకత్వం వహిస్తున్న ఈ చిత్రంలో తమిళనాడు దివంగ‌త ముఖ్యమంత్రి, పాపులర్ నటుడు ఎం.జి. రామ‌చంద్ర‌న్ పాత్ర‌లో ప్ర‌ముఖ న‌టుడు అర‌వింద స్వామి న‌టిస్తుండ‌గా, మ‌రో దివంగ‌త ముఖ్యమంత్రి క‌రుణానిధి పాత్ర‌లో ప్ర‌కాశ్‌రాజ్ న‌టిస్తున్నారు. 

ఈ సినిమా షూటింగ్ శరవేగంగా జరుగుతోంది. మూడు భాషల్లో ఈ సినిమా విడుదల కానుంది. కాగా ఈ సినిమాలో జయలలిత పోస్టర్ ప్రస్తుతం నెట్టింట వైరల్ అవుతోంది. జయలలిత ఉన్నత స్థాయి నటిగానే కాకుండా గొప్ప డాన్సర్ గానూ కీర్తి పొందారు. 

ఈ లుక్‌లో శాస్త్రీయ నృత్యం చేస్తున్న భంగిమలో కంగనా అమితంగా ఆకట్టుకుంటున్నారు. చుట్టూ పలువురు డాన్సర్లు నాట్యం చేస్తుండగా, మధ్యలో జయలలితగా కంగన నాట్యం చేస్తున్న తీరు ప్రేక్షకులను బాగానే ఆకట్టుకుంటోంది. ఇప్ప‌టికే విడుద‌ల చేసిన రాజకీయ నాయకురాలిగా జ‌య‌ల‌లిత లుక్‌, టీజ‌ర్‌, ఎంజీ రామ‌చంద్ర‌న్ ఫస్ట్‌లుక్‌కు మంచి స్పందన వచ్చింది. కాగా ఈ సినిమా 2020, జూన్ 26వ తేదీన విడుదల కానుంది.

ఇకపోతే.. జయలలిత సినిమా కోసం కంగనా రనౌత్ పదికిలోల బరువు పెరిగినట్లు తెలిపింది. జయలలిత అంకితభావం విని షాక్ అయ్యానని కంగనా చెప్పుకొచ్చింది. ఈ సినిమా కోసం ప్రతీ సీన్‌కు వర్కౌట్స్ చేస్తున్నానని వెల్లడించింది.