స్వర్గీయ నందమూరి తారక రామారావు బయోపిక్‌ను డైరెక్ట‌ర్ తేజ తెర‌కెక్కిస్తోన్న విష‌యం తెలిసిందే. నందమూరి న‌ట‌సింహం బాలకృష్ణ తండ్రి పాత్రలో నటిస్తూ.. మరోపక్క నిర్మాతగానూ వ్యవహరిస్తున్నారు. ఇటీవ‌ల సినీ ప్ర‌ముఖులు, రాజ‌కీయ ప్ర‌ముఖుల స‌మ‌క్షంలో ప్రారంభ‌మైన ఈ చిత్రం గురించి ఇప్పుడు ఓ ఇంట్ర‌స్టింగ్ న్యూస్ ఒక‌టి బ‌య‌ట‌కు వ‌చ్చింది. ఆ వార్త ఏమిటంటే... ఈ చిత్రంలో కళ్యాణ్‌రామ్ న‌టిస్తున్నాడ‌నేది ఆ వార్త సారాం‍శం.
ఇంత‌కీ... కళ్యాణ్ రామ్ పాత్ర ఏమిటంటే.. హరికృష్ణ పాత్రను కళ్యాణ్ రామ్ పోషించ‌నున్నాడ‌ట. ఎన్టీఆర్ అధికారంలోకి రావటానికి ఎన్నికల సమయంలో చేపట్టిన చైతన్య రథం ఓ కారణం. ఆ రథాన్ని నడిపింది ఎన్టీఆర్ తనయుడు హరికృష్ణే. దీంతో ఈ పాత్రకు కళ్యాణ్ రామ్ అయితేనే బావుంటుందన్న ఆలోచనతో ఆ నందమూరి హీరోను మేకర్లు సంప్రదించినట్లు తెలుస్తోంది.
ఇక చిత్ర లాంఛింగ్‌కు కళ్యాణ్ రామ్ హాజరుకావటం.. పైగా తన తండ్రి పాత్రే కావటంతో సానుకూలంగా స్పందించే అవకాశం ఉంది అని టాక్ వినిపిస్తోంది. మరోవైపు నారా రోహిత్‌, తారకరత్నలకు కూడా ఈ చిత్రంలో పాత్రలు దక్కాయని ఆ కథనం వివరించింది. మే నుంచి ఎన్టీఆర్ చిత్రం రెగ్యులర్‌ షూటింగ్‌ జరుపుకోబోతుండగా.. దసరాకు చిత్రం విడుదల కానుంది.
