బాలీవుడు నటుడు, పద్మభూషణ్ అవార్డు గ్రహీత శశికపూర్ ఇకలేరు. ఆయన సోమవారం కన్నుమూశారు. ఆయన వయసు 79 యేళ్లు. గతకొంతకాలంగా అనారోగ్యంతో బాధ పడుతూ వచ్చిన ఆయన ఆస్పత్రిలో చికిత్స పొందుతూ తుదిశ్వాస విడిచారు. ఆయ‌న‌కు ముగ్గురు పిల్ల‌లు ఉన్నారు. శశికపూర్ మృతిపట్ల పలువురు బాలీవుడ్ ప్రముఖులు సంతాపం తెలిపారు.
1938 మార్చి 18న కోల్‌క‌తాలో శశికపూర్ జ‌న్మించారు. 1941 నుంచి ప్రారంభ‌మైన ఆయన న‌ట ప్రస్థానం 1999 వ‌ర‌కు కొన‌సాగింది. సంగ్రామ్ (1950), దనపాణి (1953) లాంటి వ్యాపారాత్మక చిత్రాల్లో బాల నటుడిగా తన ప్రస్థానం ప్రారంభించారు. న‌టుడిగానే కాకుండా ద‌ర్శ‌కుడిగా, నిర్మాత‌గా ఆయన రాణించారు.
హిందీ ఫిల్మ్ ఇండస్ట్రీలో డైరెక్టర్, అసిస్టెంట్ డైరెక్టర్‌గా పని చేశారు. సినిమా రంగానికి ఆయన అందించిన సేవలకుగానూ 2011లో పద్మభూషణ్ అవార్డుతో శశికపూర్‌ను భారత ప్రభుత్వం సత్కరించింది. 2015లో దాదాసాహెబ్ ఫాల్కే అవార్డు, 2010లో ఫిల్మ్‌ఫేర్ జీవిత సాఫల్య పుర‌స్కారం, 1994లో నేష‌న్ ఫిల్మ్ అవార్డులు వరించాయి. దివార్, కభీకభీ, సిల్‌సిలా, అవారా, సత్యం శివం సుందరం, నమక్ హలాల్, కాలపత్తర్, రోటి కప్‌డా ఔర్ మకాన్ లాంటి హిట్ సినిమాల్లో శశికపూర్ నటించి విశేష ఆదరణ పొందారు.
