ప్రతి మహిళ రోజూ ఖచ్చితంగా ఓ గ్లాసు పాలు తాగాలని వైద్య నిపుణులు సూచిస్తున్నారు. దీనికి అనేక కారణాలు లేకపోలేదంటున్నారు. శరీరానికి అవసరమైన కనీస ప్రోటీన్లు, కొవ్వు పాల ద్వారానే అందుతాయన్నది ప్రతి ఒక్కరికీ తెలిసిన విషయం. అయితే, మహిళల్లో వయసు పెరిగేకొద్ది కాల్షియం సమస్యలు ఉత్పన్నమవుతుంటాయి. దాంతో ఎముకలు బలహీనపడిపోతాయి. అందుకే మహిళలు ప్రతి రోజూ ఖచ్చితంగా పాలు తాగడం ఆరోగ్యానికి ఎంతో మంచిది.
ఉదయం నిద్ర లేచినది మొదలుకుని రాత్రి పడక గదికి చేరేంత వరకు ప్రతి మహిళ ఎంతో శ్రమిస్తుంది. దీనివల్ల మానసికంగానే కాకుండా శారీరకంగా కూడా బాగా అలసిపోతుంది. ఒత్తిడితో కూడుకున్న జీవితం సుఖ నిద్రకు దూరం చేస్తుంది. అందుకే నిద్రకు ముందు ఒక గ్లాసు పాలను తాగడం ఎంతో మంచింది. ఎందుకంటే... పాలల్లో ఉండే అమినో ఆసిడ్స్ మెదడులో ఏర్పడిన ఒత్తిడిని మాయం చేసి సుఖమయ నిద్రలోకి జారుకునేలా చేస్తుంది.
అలాగే, పాలల్లో ఉండే కాల్షియం మన శరీరం ఆరోగ్యంగా ఎదగడానికి అవసరమైన శక్తిని అందించి, మంచి ఎత్తు, బరువు పెరిగేలా చేస్తాయి. వాస్తవానికి మన శరీర ఎదుగుదలలో పాలు ముఖ్య పాత్ర పోషిస్తాయి. మనం తీసుకునే ఆహారంలో పాలు అత్యంత బలవర్ధకమైన ఆహారం. కాబట్టి ప్రతిరోజూ ఓ గ్లాసు పాలు తాగి, అనారోగ్య సమస్యలకూ దూరంగా ఉండమని వైద్యులు సూచిస్తున్నారు.
