జయలలిత చివరి కోరిక మాత్రం నెరవేరలేదు... మీరు చూస్తూ ఉండండి ప్రధాని సీటులో కూర్చుంటా..

తమిళనాడు దివంగత సీఎం జయలలిత అంత్యక్రియలు మంగళవారం సాయంత్రం చెన్నై మెరీనా బీచ్‌లో ముగిశాయి. జయలలితను చివరి చూపు కోసం వివిధ రాష్ట్రాల నుంచి భారీ ఎత్తున జనం తరలివచ్చారు. బస్సులన్నీ రద్దుచేసిన జనం రైళ్లు, ప్రత్యేక వాహనాలు ఏర్పాటు చేసుకుని జనం చెన్నైకు చేరుకున్నారు. చెన్నై సెంట్రల్‌కు చేరుకున్న సిటీ రైళ్ల నుంచి అన్నాసాలైకు చేరుకున్నారు.

వివిధ ప్రాంతాల నుంచి వచ్చిన జనంతో అన్నాసాలై కూడలి జనంతో కిక్కిరిసింది. రాజాజీహాలు వద్ద ఉన్న దివంగత ముఖ్యమంత్రి జయలలిత పార్థివదేహం వరకు పోలీసు బందోబస్తు ఏర్పాటు చేశారు. కూడలి నుంచి బారికేడ్లు ఏర్పాటు చేసినా... భారీ ఎత్తున జనం చొచ్చుకు రావటంతో పోలీసులు వారిని నిలువరించలేకపోయారు. 

ఈ నేపథ్యంలో.. అమ్మ చివరి కోరిక మాత్రం నెరవేరలేదని అన్నాడీఎంకే కార్యకర్తలు చర్చించుకుంటున్నారు. ''మీరు చూస్తూ ఉండండి... నేను ఎప్పటికైనా ముందు సీటులో ఉన్న ప్రధాని సీట్లో కూర్చుంటా'' అని రాజ్యసభ సభ్యురాలిగా వెనక బెంచీలో కూర్చున్న జయలలిత తన పక్కన కూర్చున్న నామినేటేడ్‌ సభ్యుడు, జర్నలిస్టు కుష్వంతసింగ్‌కు చెప్పేవారు. ఎప్పటికైనా ప్రధాని కావాలన్నదే ఆమె కోరిక.. ఆ కోరిక నెరవేరకుండా పోయింది. 

1999లో ఆ అవకాశం ఒక్కసారి వచ్చినట్లే వచ్చి చేజారిపోయింది. కాంగ్రెస్‌ అధ్యక్షురాలు సోనియాగాంధీ కారణంగానే తనకు ప్రధాని పదవి దక్కలేదన్న కోపంతో అప్పటి నుంచి కాంగ్రెస్‌తో సంబంధాలను తెంచుకుని బీజేపీకి జయలలిత దగ్గరయ్యారు. అందుకే వాజ్‌పేయి ప్రభుత్వాన్ని కూడా పడగొట్టారు. కాంగ్రెస్ తనకు మద్దతునిచ్చి ప్రధానిని చేస్తుందనుకుంటే అది కూడా జరగలేదు.

1979లో మొరార్జీ దేశాయ్‌ను పడగొట్టి చరణ్‌సింగ్‌ను, 1989లో వీపీ సింగ్‌నును తొలగించి చంద్రశేఖర్‌ను ప్రధానిని చేసిన కాంగ్రెస్‌ తన విషయంలో మొండి చేయి చూపించిందన్న కోపం జయలలితకు చివరి వరకూ ఉంది.