మెగా పవర్ స్టార్ రామ్ చరణ్ తేజ్ హీరోగా నటిస్తోన్న చిత్రం 'ధృవ'. ప్రస్తుతం ఈ సినిమా షూటింగ్ శరవేగంగా జరుగుతోంది. ఈ సినిమాలో చెర్రీ సరసన రకుల్ ప్రీత్ సింగ్ హీరోయిన్‌గా నటిస్తోంది. రకుల్ ప్రీత్ సింగ్ చరణ్ సరసన రోండోసారి హీరోయిన్‌గా నటిస్తుండడంతో ఈ సినిమాపై భారీ అంచనాలు నెలకొన్నాయి. ఈ చిత్రానికి సురేందర్ రెడ్డి దర్శకత్వం వహిస్తున్నాడు. ఈ చిత్రాన్ని గీతా ఆర్ట్స్‌ బ్యానర్‌పై అల్లు అరవింద్‌ నిర్మిస్తున్నారు.
గతేడాది తమిళంలో విడుదలై ఘన విజయం సాధించిన 'తని ఒరువన్‌'కి రీమేక్‌గా ఈ చిత్రాన్ని రూపొందిస్తున్నారు. దీంట్లో రామ్ చరణ్ కొత్తలుక్‌లో కనిపించబోతున్నారు. సురేందర్ రెడ్డి కాంబినేషన్‌లో తెరకెక్కుతుండడంతో ఈ చిత్రంపై ఇప్పటికే ప్రేక్షకుల్లో అంచనాలు పెరిగాయి. అంచనాలకు ఏమాత్రం తగ్గకుండా సినిమాను భారీగా నిర్మిస్తున్నారు. ఈ చిత్రంలో మరో ఆకర్షణగా అరవింద్‌ స్వామి క్యారెక్టరైజేషన్‌ నిలుస్తుంది.
ఇటీవలే రిలీజ్ చేసిన ఈ మూవీ ప్రీ లుక్ పోస్టర్‌కు ప్రేక్షకుల నుండి అనూహ్య స్పందన లభించింది. ఈ చిత్రాన్ని దసరా కానుకగా విడుదల చేయాలని దర్శకనిర్మాతలు సన్నాహాలు చేస్తున్నారు. అంతేకాదు ధృవ టీజర్‌ను సెప్టెంబర్ 2న పవర్ స్టార్ పవన్ కళ్యాణ్ బర్త్ డే స్పెషల్‌గా విడుదల చేయాలనుకుంటున్నారు. అయితే ఈ టీజర్ లాంచ్ కోసం పవర్ స్టార్ పవన్ కళ్యాణ్‌ను ముఖ్య అతిధిగా రప్పించాలని యూనిట్ సభ్యులు భావిస్తున్నారు. మరి చెర్రీ కోసం బాబాయ్ వస్తాడో లేదో తెలియాలంటే...సెప్టెంబర్ 2 దాకా ఆగాల్సిందే.
