జనసేన పార్టీ అధ్యక్షుడు, టాలీవుడ్ టాప్ హీరో, పవర్ స్టార్ పవన్ కల్యాణ్ కథానాయకుడిగా డాలీ దర్శకత్వంలో రూపొందుతున్న 'కాటమరాయుడు' సినిమా షూటింగ్ శరవేగంగా జరుగుతోంది. శరత్ మరార్ నిర్మిస్తోన్న ఈ సినిమాలో కథానాయికగా శ్రుతిహాసన్ నటిస్తోంది. ఈ సినిమా తాజా షెడ్యూల్ ఈ నెల 5వ తేదీ నుంచి రామేశ్వరంలో ప్లాన్ చేశారు. అయితే ఈ షెడ్యూల్ వాయిదా పడినట్టు టాలీవుడ్ వర్గాలు అంటున్నారు.
శ్రుతిహాసన్ ఈ డేట్స్‌లో హాజరు కాలేకపోతున్నందు వలన, షూటింగ్‌ను నవంబర్‌కి వాయిదా వేసినట్టు సినీనిపుణులు అంటున్నారు. వచ్చేనెల నుంచి షూటింగ్ వేగం పెంచి, ఫిబ్రవరి నాటికి పూర్తిచేయాలనే ఆలోచనలో వున్నారని అంటున్నారు. పవన్ - శ్రుతిహాసన్ కాంబినేషన్లో గతంలో వచ్చిన 'గబ్బర్ సింగ్' భారీ విజయాన్ని సొంతం చేసుకోవడంతో, ఈ సినిమాపై అందరిలోనూ ఆసక్తి రేకెత్తుతోంది.
కాగా పవర్ స్టార్ పవన్ కళ్యాణ్ తన స్పీడ్ ఏంటో చూపించడానికి ఈ సినిమాతో రెడీ అయ్యాడు. ఎప్పుడూ కూడా నింపాదిగా సినిమాలు చేస్తాడని, తనకు నచ్చినప్పుడు షూటింగ్‌లు ప్లాన్ చేసుకుంటాడని పవన్ పైన కొన్ని ఆరోపణలు ఉన్నాయి. అభిమానులు కూడా ఈ విషయంలో పవన్‌ని వ్యతిరేకిస్తుంటారు. వరుసగా సినిమాలు చేయమని పవన్‌పైన ఒత్తిడి తెస్తూ ఉంటారు. అభిమానుల మాటే విన్నాడో. లేక 2019లోపు వీలైనన్ని ఎక్కువ సినిమాలు చేసేయాలని ఫిక్స్ అయ్యాడో కానీ ఓవరాల్‌గా పవన్ మాత్రం ఫుల్ సినిమాలతో బిజీబిజీగా ఉన్నాడు.
