హైదరాబాద్ నగరానికి చెందిన ఓ వ్యక్తి పెళ్లయి భార్య ఉండగానే.. చనువుగా ఉన్న మరో మహిళను పెళ్లాడాడు. సక్రమంగా పనిచేయక ఉద్యోగం పోగొట్టుకున్నాడు. డబ్బు సంపాదనకు వారిద్దరూ కలిసి పగటివేళ దొంగతనాలు చేయటం ప్రారంభించారు. తేలికగా కాసులు సంపాదించే మార్గం కావటంతో యధేచ్ఛగా చోరీలకు పాల్పడుతూ జల్సా చేస్తున్నారు. ఈ దొంగతనాలపై పలువురు ఫిర్యాదులు చేయడంతో రెక్కీ నిర్వహించిన పోలీసులు వారిని అరెస్టు చేశారు. ఈ వివరాలను పరిశీలిస్తే...
ముందుగా రెక్కీ చేసి అనంతరం తెలివిగా ఆ ఇళ్లలోకి దూరి చోరీలు చేసేవారు. చాకచక్యంగా ఇళ్లల్లో దొంగతనాలు చేస్తున్న వీరి ఆచూకీని పోలీసులు సీసీ కెమెరాల ద్వారా గుర్తించారు. పూర్తి ఆధారాలతో దొంగ దంపతులను అరెస్ట్‌ చేసి రిమాండ్‌కు తరలించినట్లు టాస్క్‌ఫోర్స్‌ డీసీపీ బి.లింబారెడ్డి తెలిపారు. ఆదివారం సికింద్రాబాద్‌ టాస్క్‌ఫోర్స్‌ కార్యాలయంలో ఏర్పాటు చేసిన విలేకరుల సమావేశంలో వివరాలు వెల్లడించారు.
హైదరాబాద్, అంబర్‌పేట్‌ శంకర్‌నగర్‌‌కు చెందిన ఒగ్గు శ్రీనివాస్. గతంలో ఓ కంపెనీలో పని చేసేవాడు. నెలవారీ రూ.7 వేలు వేతనం వచ్చేది. వివాహమై భార్య కూడా ఉంది. అయితే, తాను పని చేసే కంపెనీలో రేణుక అనే మహిళ పరిచయమైంది. ఈమెను రెండో పెళ్లి చేసుకున్నాడు. ఆమె కూడా ఓ ఇంట్లో పని చేసేది. ఈ నేపథ్యంలోనే అతడి ప్రవర్తన సరిగాలేదని ఉద్యోగం నుంచి తొలగించారు. అయితే, వచ్చే ఆదాయం చాలక పోవడంతో భార్యభర్తలిద్దరూ అడ్డదారిని ఎంచుకున్నారు. ఆర్థిక ఇబ్బందులను అధిగమించేందుకు దొంగలుగా మారి చివరకు పోలీసుల రెక్కీతో పట్టుబడ్డారు.
