వైఎస్సార్ కాంగ్రెస్ పార్టీ అధినేత వై.ఎస్. జగన్మోహన్ రెడ్డి అనంతపురంలో ఏపీ సీఎం చంద్రబాబుపై తీవ్రంగా విమర్శలు గుప్పించడంపై సర్వత్రా విమర్శలు వెల్లువెత్తున్నాయి. ఈ నేపథ్యంలో వైకాపా వైఖరిపై చినబాబు నారా లోకేష్ ట్విట్టర్ ద్వారా స్పందించారు. టీడీపీ శ్రేణులకు తన సందేశాన్ని పంపారు. వైకాపా పార్టీ రాష్ట్ర వ్యతిరేకి అని.. ఆ పార్టీ నేతల వ్యాఖ్యలను పట్టించుకోవద్దన్నారు.
ఇకపోతే.. అనంతపురం జిల్లాలో జగన్మోహన్ రెడ్డి చేపట్టిన రైతు భరోసా యాత్రలో భాగంగా ఓబులదేవరచెర్వు గ్రామంలో పర్యటించారు. ఈ సందర్భంగా అక్కడి స్థానికులని ఉద్దేశించి ప్రసంగించిన జగన్... చంద్రబాబుకి చెప్పులు చూపించడం ఇష్టంలేకపోవడంతో..ఈసారి చెప్పులకు బదులు చీపుర్లు చూపించండని వెల్లడించారు. ఇప్పటికే జగన్ చేసిన చెప్పు వ్యాఖ్యలపై ఆగ్రహంతో ఊగిపోతున్న టీడీపీ శ్రేణులు, తాజాగా చీపుర్ల వ్యాఖ్యలపై మండిపడుతున్నారు.
