ఆంధ్రప్రదేశ్ రాష్ట్ర నూతన గవర్నరుగా అబ్దుల్ నజీర్ నియమితులయ్యారు. ఈ మేరకు రాష్ట్రపతి ద్రౌపది ముర్ము ఉత్తర్వులు జారీచేశారు. దేశ వ్యాప్తంగా మొత్తం 12 రాష్ట్రాలకు కొత్తగా కేంద్రం గవర్నర్లను నియమించింది. కొన్ని రాష్ట్రాల గవర్నర్లకు స్థానభ్రంశం కల్పించింది. ఇలాంటి రాష్ట్రాల్లో ఏపీ ఒకటి. ఏపీ గవర్నరుగా ఉన్న బిశ్వభూషణ హరిచందన్‌ను ఛత్తీస్‌గఢ్ గవర్నరుగా నియమిస్తూ ఉత్తర్వులు జారీచేసింది.
మరోవైపు, ఏపీ గవర్నరుగా నియమితులైన జస్టిస్ అబ్దుల్ నజీర్.. గతంలో సుప్రీంకోర్టు న్యాయమూర్తిగా పని చేశారు. సుప్రీంకోర్టు వెలువరించిన అనేక కీలక తీర్పుల్లో భాగస్వామిగా ఉన్నారు. ముఖ్యంగా, అయోధ్య రామమందిరంపై ప్రతిష్టాత్మక తీర్పు ఇచ్చిన ఐదుగురు న్యాయమూర్తుల ధర్మాసనంలో ఆయనా ఒకరు. ఇటీవలే పదవీ విరమణ చేశారు.
ఆ ధర్మాసనంలోని ఒకే ఒక మైనారిటీ న్యాయమూర్తి జస్టిస్ నజీర్. అయోధ్యలో హిందూ నిర్మాణం ఉనికి ఉందంటూ పురావస్తుశాఖ ఇచ్చిన తీర్పును ఆయన సమర్ధించారు. నోట్ల రద్దు చట్టబద్ధమని ప్రకటించిన సుప్రీం ధర్మాసనంలోనూ ఆయన సభ్యులుగా ఉన్నారు. ఈ ఏడాది జనవరి 4న పదవీ విరమణ చేసిన జస్టిస్ నజీర్‌ను కేంద్ర ప్రభుత్వం గవర్నర్ పదవికి సిఫారసు చేయగా రాష్ట్రపతి ఆమోద ముద్ర వేశారు.
