ఇప్పటికే ఈ అంతుచిక్కని వ్యాధితో గత మూడు రోజుల వ్యవధిలో ఏకంగా 300మందికి పైగా స్థానికులు ఆస్పత్రి పాలయ్యారు. కొద్దిపాటి వాంతులు, మూర్ఛ, నోటి వెంట నురగతో గడిచిన 24 గంటలుగా రోగులు వరదలా వచ్చి చేరుతూనే ఉన్నారు. వ్యాధి ఏమిటో అంతుపట్టని వైద్యులు అందరికీ ప్రాథమిక చికిత్స చేస్తున్నారు. ఇప్పటికీ దాదాపు 150మందికి పైగా ఇన్‌పేషెంట్లు ఉన్నారు.
ముందు జాగ్రత్త చర్యల్లో భాగంగా ఆస్పత్రికి వచ్చిన దాదాపు 270మందికి కొవిడ్‌ ర్యాపిడ్‌ టెస్ట్‌లు నిర్వహించగా అందరికీ నెగిటివ్‌ వచ్చినట్టు వైద్యాధికారులు ధ్రువీకరించారు. అప్పటికప్పుడు పదేళ్ల లోపు చిన్నారులు కొందరు హఠాత్తుగా ఫిట్స్‌ వచ్చి కూలపడడం, వీరంతా ఆస్పత్రికి రావడం తాజా పరిణామం.
నిజానికి ఈ వ్యాధి ఏలూరులోని దక్షిణపు వీధికి చెందిన కొందరిలో ఫిట్స్‌ లక్షణాలు కన్పించాయి. వీరంతా చికిత్స కోసం ప్రైవేట్‌ ఆస్పత్రులను ఆశ్రయించారు. రోగ నిర్ధారణ కాకపోవడంతో అందరూ ప్రభుత్వ ఆస్పత్రులకు వెళ్లాలంటూ అక్కడి వైద్యులు సూచించారు. అప్పటినుంచి ఆదివారం రాత్రి నాటికి 300మందికి పైగా చికిత్స కోసం ఆస్పత్రి బాట పట్టేశారు.
సాధారణంగా ఈ ప్రాంతంలో నీటి కాలుష్యం కారణంగానే ఏడాది పొడవునా ఎంతో కొంతమంది డయేరియా బారిన పడుతూనే ఉంటారు. కానీ ఇప్పుడీ వ్యాధి అందరికీ పెద్ద పజిల్‌గా మారింది. వ్యాధి లక్షణాలు, రోగి తీరుతెన్నులను క్షుణ్ణంగా పరిశీలించినా వైద్యనిపుణులు ఒక నిర్ణయానికి రాలేకపోతున్నారు. ఒకరిద్దరు మాత్రం మాస్‌ హిస్టీరియా అని తేల్చేస్తున్నారు. మరికొందరు మెదడు వాపు వ్యాధి అంటున్నారు. తాజా పరిస్థితికి అధికార పక్షం అంతుపట్టని వ్యాధిగా నామకరణం చేసింది.
