ఆంధ్రప్రదేశ్ రాష్ట్ర కొత్తమంత్రివర్గం తొలి సమావేశం శుక్రవారం జరుగనుంది. ఏపీ ముఖ్యమంత్రి వైఎస్. జగన్మోహన్ రెడ్డి అధ్యక్షతన ఈ భేటీ జరుగనుంది. ఇటీవల ఏపీ మంత్రివర్గాన్ని పునర్‌వ్యవస్థీకరించిన విషయం తెల్సిందే. ఆ తర్వాత కొత్త మంత్రివర్గం ఒక్కసారి కూడా సమావేశంకాలేదు. ఈ నేపథ్యంలో శుక్రవారం మధ్యాహ్నం 3 గంటలకు సచివాలయంలో జరుగనుంది. ఈ భేటీ కోసం అధికారులు అన్ని ఏర్పాట్లు చేశారు.
అలాగే, దిశ చట్టం సవరణలకు సంబంధించిన అంశాన్ని కూడా మంత్రివర్గంలో మరోమారు నిర్ణయం తీసుకుని కేంద్రానికి పంపే అవకాశాలు ఉన్నాయి. అలాగే, ఇటీవల కోనసీమ జిల్లా పేరు మార్పుపై చోటుచేసుకున్న ఉద్రిక్త పరిస్థితులతో పాటు ఆ జిల్లా మార్పుపై కూడా చర్చించనున్నట్టు తెలుస్తోంది.
అలాగే, రాష్ట్రపతి ఎన్నికల్లో ఎన్డీయే అభ్యర్థి ద్రౌపది ముర్ముకు వైకాపా ఎంపీలు మద్దతు ఇచ్చే విషయంపై కూడా ఈ భేటీలో చర్చించనున్నారు. ఇప్పటికే భేషరతు మద్దతు ప్రకటించిన వైకాపా.. ఆమె నామినేషన్ దాఖలు సమయంలోనూ వైకాపా ఎంపీలు పాల్గొన్నారు.
