ఏపీ రాష్ట్ర దేవదాయశాఖామంత్రి మాణిక్యాలరావు మరోసారి సంచలన వ్యాఖ్యలు చేశారు. టిడిపి, బిజెపిల మధ్య గ్యాప్ పెరుగుతున్న నేపథ్యంలో మంత్రి వ్యాఖ్యలు మరింతగా ఇరకాటంలో నెడుతున్నాయి. తెలుగుదేశం పార్టీతో కలిసి ఉండడం నాకు ఏ మాత్రం ఇష్టం లేదు. ఆ పార్టీకి దూరమవ్వడమే మంచిదని నాకు అనిపిస్తోంది. వారితో దూరమవ్వడం వల్ల మాకు ఎలాంటి నష్టం లేదు. నష్టమంతా టిడిపికే. అది వారు తెలుసుకోవాలంటూ మాణిక్యాలరావు సంచలన వ్యాఖ్యలు చేశారు.
ఆయన అంతటితో ఆగలేదు. చంద్రబాబునాయుడు కూడా కేంద్రంలోని బిజెపిని టార్గెట్ చేయడం అస్సలు బాగాలేదు. టిడిపి నేతలందరూ బిజెపిపై ఎందుకు దుమ్మెత్తిపోస్తున్నారు. ఇది మంచిది కాదు. నాలుగు సంవత్సరాలు కలిసే ఉన్నాం కదా.. ఎప్పుడూ మాట్లాడని టిడిపి నేతలు.. ఇప్పుడెందుకు రెచ్చిపోతున్నారు.. నోళ్ళు అదుపులో పెట్టుకుంటే బాగుంటుందంటూ తీవ్రస్థాయిలో టిడిపి నేతలపై మండిపడ్డారు.
