బొజ్జల గోపాలకృష్ణా రెడ్డి మంత్రి పదవి పోయింది. పదవి పోతుందంటూ ముందు నుంచే మీడియాలో లీకులు మీద లీకులు వచ్చాయి. రాజకీయంలో ఇదీ ఓ భాగమే. ఆమధ్య యూపీఎ కూడా ఆంధ్రప్రదేశ్ విభజనపై రోజుకో రకంగా లీకులు ఇస్తూ గడబిడ చేస్తుండేది. ఇలాంటి లీకులనే మంత్రిమండలి నుంచి తప్పించే వారి విషయంలోనూ మీడియాలో వచ్చాయి. ఈ లీకులపై ఎవరెన్ని మాట్లాడారన్న సంగతి ప్రక్కన పెడితే... బొజ్జల గోపాలకృష్ణారెడ్డి సతీమణి మాత్రం ఓ రేంజ్‌లో ఫైర్ అయ్యారట.
ఓ మీడియా అధినేతను పట్టుకుని చెడామడా కడిగిపారేశారట. ఇంతకీ విషయం ఏంటయా అంటే... సదరు మీడియా అధిపతి ఓ విలేకరిని బొజ్జల ఇంటికి పంపి బాబుపై అలిగిన బొజ్జలను బుజ్జగించేందుకు ప్రయత్నించారట. అదే సమయంలో అక్కడికి మంత్రి గంటా కూడా వచ్చారనీ, దానితో విలేకరితో పాటు మంత్రిగారికి కూడా ఘాటు ప్రశ్నలను సంధించడంతో బిత్తరపోయారట. అదీ సంగతి.
