హైదరాబాద్, పాతబస్తీలోని షామ థియేటర్ ముందు పెళ్లి బారాత్ జరుగుతుంటే పెళ్లు కుమారుడు గుర్రంపై కూర్చుని రెండు చేతులతో రెండు పిస్టల్స్ పట్టుకుని దాదాపు 10 రౌండ్లు కాల్పులు జరిపాడు. ఈ కాల్పుల ఘటన గత నెల 22వ తేదీన జరిగింది. పెళ్లి కుమారుడు కాల్పులు జరుపుతుంటే వివాహ కార్యక్రమానికి హాజరైన బంధువులు, స్నేహితులు కేరింతల కొట్టారు. ఈ కాల్పుల ఘటన ఆలస్యంగా వెలుగులోకి వచ్చింది.
ఆదివారం ఉదయం నుంచి కాల్పులు జరిగిన దృశ్యాలు వివిధ టీవీ చానళ్లలో పదేపదే టెలికాస్ట్ అవుతుండగా, ఫలక్‌‌నుమా ఏసీపీ ఆధ్వర్యంలోని నాలుగు బృందాలు ఘటనా స్థలికి చేరుకుని దర్యాఫ్తు చేపట్టి, సీసీటీవీల ఫుటేజ్‌లను పరిశీలించి బరాత్ ఎక్కడి నుంచి ఎక్కడికి సాగిందో తెలుసుకున్నారు. ఆపై మ్యారేజ్ ఫంక్షన్ హాల్ నుంచి వరుడి వివరాలు సేకరించి అదుపులోకి తీసుకున్నారు.
