ఏపీ ముఖ్యమంత్రి, వైకాపా అధినేత జగన్మోహన్ రెడ్డిపై ఆయన బావ, వైఎస్.షర్మిల భర్త బ్రదర్ అనిల్ కుమార్ సుతిమెత్తని విమర్శలు చేశారు. జగన్ పేరు ఎక్కడా ప్రస్తావించకుండా విమర్శలు గుప్పించారు. ఈ రాష్ట్రం(ఏపీ)లో పుట్టడం కంటే ఇతర రాష్ట్రాల్లో పుట్టినా బాగుండేదని ప్రజలు అనుకుంటున్నారంటూ వ్యాఖ్యలు చేసి పెద్ద చర్చకు దారితీశారు.
క్రిస్మస్ పండుగను పురస్కరించుకుని విశాఖపట్టణం జిల్లా భీమిలి మండలంలోని క్రైస్ట్ కేర్ అండ్ క్యూర్ మినిస్ట్రీ‌‍లో గురువారం జరిగిన సామూహిక ప్రార్థన సమావేశంలో ఆయన పాల్గొన్నారు. ఈ సందర్భంగా ఆయన మాట్లాడుతూ, దేవుడి పథకాలు వేరే విధంగా ఉంటాయని, ప్రభుత్వ పథకాలపై ఆధారపడొద్దంటూ సూచించారు.
