స్వర్గీయ ఎన్టీఆర్ బయోగ్రఫీని వెండితెరపై ఆవిష్కరించాలని భావిస్తున్న తన సోదరుడు బాలకృష్ణకు కేంద్ర మాజీ మంత్రి, బీజేపీ మహిళా నేత పురంధేశ్వరి ఓ సలహా ఇచ్చారు. ఇదే అంశంపై ఆమె మాట్లాడుతూ తన తండ్రి దివంగత ఎన్టీ రామారావు జీవిత చరిత్రను సినిమాగా తీయాలని భావిస్తున్న తమ్ముడు బాలకృష్ణ ఆ చిత్రం ద్వారా ఏం చెప్పినా నిజమే చెప్పాలన్నది తన అభిమతమన్నారు.
ఎన్టీఆర్ జీవితంలో జరిగిన యధార్థ సంఘటనల్లో ఏ ఒక్కదాన్ని దాచకుండా చెబితే, తాను అభినందిస్తానని, తప్పయినా, ఒప్పయినా బాలకృష్ణ క్లియర్‌గా చూపించాలని సలహా ఇచ్చారు. ఇకపోతే.. వైకాపాలో చేరేది ఎప్పుడన్న ప్రశ్నకు ఆమె సమాధానమిస్తూ... అవి కేవలం పుకార్లు మాత్రమేనని, ఆ పార్టీలో చేరే ప్రసక్తే లేదని చెప్పారు. ఏ పార్టీలోనైనా గౌరవం ఉన్నంతకాలం మాత్రమే ఉండగలమని అన్నారు.
