సెలబ్రిటీలకు డ్రగ్స్ "మత్తు"... సామాన్యులకు మద్యం "మత్తు"... దోషులెవరు?

గత 10 రోజులుగా హాట్ టాపిక్‌గా నడుస్తున్న డ్రగ్స్ దందాలో కొంతమంది సినిమా సెలబ్రిటీలను రోజూ విచారణ పేరుతో గంటల కొద్దీ ప్రశ్నలు సంధిస్తున్నారు. వారు ఎలా సమాధానాలు చెప్తున్నారోగానీ, దాని నుండి ఒక సామాన్యుడు అనేక ప్రశ్నలు లేవనెత్తుతున్నాడు. అందులో మొదటిది:

1) డ్రగ్స్ విచ్చలవిడిగా దేశంలోకి తీసుకొస్తున్నపుడు, పోలీసు వ్యవస్థ ఏమైనా నిద్రపోతున్నదా? లేక ఆమ్యామ్యాలకు అలవాటుపడి, ఇన్నాళ్లూ వాటిని విడిచిపెట్టి ఇప్పుడు ఏదో కొత్తగా మేము కనుగొన్నామని గొప్పలు చెప్పుకుంటున్నదా?

2) వారు విచారణకు ఆదేశించిన సెలబ్రిటీలు ఎన్నోసార్లు డ్రంక్&డ్రైవ్‌లో పట్టుపడినవారు ఉన్నారు, అప్పుడు వారు మద్యం మాత్రమే సేవించారా? లేక డ్రగ్స్ తీసుకొని ఉన్నారా? అప్పుడు ఎందుకు అవి బయటకు రాలేదు?

3) ఎంతోమంది ప్రముఖుల పిల్లలు రోడ్డు యాక్సిడెంట్‌లలో పోయారు. అప్పుడు వారు మద్యం మత్తులో మాత్రమే ఉన్నారా? లేక డ్రగ్స్ సేవించి ఉన్నారా? అవి కూడా బయటకు రాలేదు. 

ఇలా వారి కర్తవ్యాలను అప్పుడు మరచి, ఇప్పుడు తామేదో కొత్తగా ఏదో చేస్తున్నామని భ్రమను కలిగిస్తున్నారు. ఇక సామాన్యులు మద్యానికి అలవాటుపడి తమ జీవితాలను చీకటిమయం చేసుకుంటున్నారు. విచిత్రమేంటంటే ఈ మద్యాన్ని ప్రభుత్వమే విచ్చలవిడిగా టెండర్లు పిలిచి, ఒక ఆర్గనైజ్డ్ క్రైమ్ వ్యవస్థగా పెంచి పోషిస్తోంది. ఇప్పుడు మీరు కూడా అందులో పాత్రధారులే కదా.. ఇక మిమ్మల్ని ఇంటరాగేట్ చేయాలంటే ఇక ఆ దేవుడే దిగిరావాలేమో అంటూ సామాన్యుడు పెదవి విరుస్తున్నాడు.