ఏప్రిల్ నుండి జూన్ వరకు ఉండే వేసవి కాలంలో ఆంధ్రప్రదేశ్ తీవ్రమైన వడగాలుల పరిస్థితులను ఎదుర్కొనే అవకాశం ఉందని వాతావరణ శాఖ హెచ్చరిస్తోంది. దేశవ్యాప్తంగా ఉష్ణోగ్రతలు సాధారణ స్థాయికి దగ్గరగా లేదా సాధారణం కంటే కొంచెం తక్కువగా ఉంటాయని భారత వాతావరణ శాఖ తెలిపింది. అయితే, రాష్ట్రంలో, ముఖ్యంగా తీరప్రాంతాల్లో మాత్రం ఇందుకు భిన్నమైన పరిస్థితి నెలకొంటుందని పేర్కొంది.
ఏప్రిల్ నెలలో, ఆంధ్రప్రదేశ్లోని పలు ప్రాంతాల్లో గరిష్ట ఉష్ణోగ్రతలు సాధారణ స్థాయిని మించి పెరిగే అవకాశం ఉంది. కొన్ని ప్రాంతాల్లో పగటి ఉష్ణోగ్రతలు గణనీయంగా పెరిగే అవకాశం ఉండగా, రాత్రులు కూడా వెచ్చగానే ఉండే అవకాశం ఉంది.
దీనివల్ల ప్రజలకు అసౌకర్యం కలగవచ్చు. తీరప్రాంత జిల్లాల్లో వేడిగాలుల పరిస్థితులు ముందుగానే ప్రారంభమవుతుండటంతో, అటువంటి రోజుల సంఖ్య సాధారణం కంటే ఎక్కువగా ఉంటుందని అంచనా వేస్తున్నారు. పెరుగుతున్న ఉష్ణోగ్రతలు ప్రజారోగ్యం, తాగునీటి సరఫరా, విద్యుత్ డిమాండ్పై ఒత్తిడిని కలిగించవచ్చని ఐఎండీ తెలిపింది.
పిల్లలు, వృద్ధులు ఆరుబయట పనిచేసేవారు వంటి బలహీన వర్గాల వారు, వేడితో ఇబ్బందులు ఎదురయ్యే అవకాశం వుంది. అదే సమయంలో, ఏప్రిల్ నెలలో దేశవ్యాప్తంగా వర్షపాతం సాధారణ స్థాయి కంటే ఎక్కువగా ఉంటుందని అంచనా.
ఆంధ్రప్రదేశ్లో కూడా సాధారణం నుండి సాధారణం కంటే అధిక స్థాయిలో వర్షపాతం నమోదయ్యే అవకాశం ఉంది. ఇది వేడి పరిస్థితుల నుండి తాత్కాలిక ఉపశమనాన్ని కలిగించినప్పటికీ, ఆకస్మికంగా లేదా అసమానంగా కురిసే వర్షాలు వ్యవసాయ కార్యకలాపాలకు సవాళ్లను సృష్టించవచ్చు.
అధిక ఉష్ణోగ్రతలు, అకాల వర్షాల కలయిక పంటల పెరుగుదల, ఉత్పాదకతపై ప్రభావం చూపవచ్చని అధికారులు తెలిపారు. మారుతున్న ఈ వాతావరణ పరిస్థితుల కారణంగా వరి, మొక్కజొన్న, పప్పుధాన్యాలు, అరటి, మామిడి వంటి పంటలు ప్రభావితమయ్యే అవకాశం ఉంది. రైతులు స్వల్పకాలిక పంట రకాలను ఎంచుకోవాలని సూచించారు.
